Në kuadër të fushatës elektorale, Drejtuesi Politik për Qarkun Gazmend Bardhi, kandidati për deputet Luçiano Boçi zhvilluan një takim me të rinjtë në Elbasan.
Ajo që vihet re është grumbullimi i disa dhjetëra personave në kohë pandemie. Edhe pse rregullat e reja të komitetit të |ekspertëve e ndalojnë rreptësisht tubimet elektorale, të tilla raste janë të përsëritura nga PD.
Gjatë vizitës në këtë qytet, Bardhi u shpreh se aleanca më natyrale e Opozitës dhe Partisë Demokratike është me të rinjtë.
Më tej ai tha se i vetmi i interesuar që rinia të largohet nga vendi dhe të qëndrojë larg kutive të votimit me 25 prill, është Edi Rama.
Bardhi bëri thirrje për pjesëmarrje masive, pasi kjo do të sjellë fundin e këtij modeli të keq politik.
Pjesë nga reagimi:
“Ne kemi një koalicion natyral me rininë. Të rinjtë e kanë kuptuar momentin e rëndësishëm, historik ku ndodhemi. Pjesa dërrmuese duan të ikin. Një pjesë pret se ca do ndodhë me 25 prill. I vetmi i interesuar në Shqipëri që rinia të largohet, është Edi Rama. Ai e di se nga energjia, nga mendja dhe nga papajtueshmëria e rinisë me padrejtësitë, rrezikon pushtetin.
Padrejtësi si goditja e familjes, dhe largimi i pjesës më vitale të shoqërisë që kanë ndodhur në këto 8 vite. Ndaj 25 prilli do të jetë referendumi i rinisë shqiptare kundër modelit që ka ofruar Edi Rama. Model që ka privilegjuar 10 vetë e ka lënë në varfëri e skamje shumicën e qytetarëve.
Leksioni që rinia do i japë Edi Ramës do të jetë një mesazh i qartë edhe ndaj nesh që do të jemi në pushtet pas 25 prillit, që do të thotë se, nëse qeveria nuk kujdeset për të rinjtë, për familjet, për pensionistët, ndëshkohet me votë.
Unë jam i sigurtë se ju që jeni këtu do të mbështesni PD për angazhimet. Nëse lexoni programin e PD, dy fjalë përsëriten më shpesh se çdo fjalë tjetër, që janë rinia dhe familja.
Po ka dhe një kujtesë. Sa herë PD ka qënë në pushtet Shqipëria ka bërë disa hapa para. Në të kundërt, sa here PS ka qënë në pushtet, Shqipëria jo vetëm nuk ka bërë hapa para, por hapa pas. Siç ka ndodhur edhe në këto 8 vite. Kjo shihet tek varfëria, skamja dhe eksodi. Në çdo biznes tashmë gjen vetëm pronarët, asnjë puëntor”, u shpreh ai.
