PD do ta përqendrojë fushatën e saj në rrjetet sociale. Kjo është porosia e Kryetarit të Partisë Demokratike, Lulzim Basha që iu ka dërguar pasditen e djeshme anëtarëve të Kryesisë së PD-së dhe krerëve të degëve.
Përmes një porosie të qartë, dërguar me SMS, lideri i PD-së kërkon ndihmën e anëtarëve të PD-së, për zbatimin e një strategjie të vecantë gjatë fushatës së zgjedhjeve.
Sipas Bashës, në kohën e pandemisë, por edhe për faktin se shumë media nuk e pasqyrojnë opozitën, rrjetet sociale mbeten mjet i rëndësishëm për shpërndarjen e mesazheve drejt qytetarëve. Ndaj, ju kërkon të bashkëpunojnë dhe ndajnë në profilet e tyre postimet e PD, në mënyrë që të shpërndahen dhe rishpërndahen sa më shumë.
Në fakt kjo metodë e propagandës ka nisur më herët. Fuksionarë të shumtë të Partisë Demokratike kanë investuar mijëra euro në rrjetet sociale.
Megjithatë kjo mënyrë e blerjes së “like” dhe “share” sjell rrezikun që të kesh ndjekës të rremë apo të huaj.
Kjo praktikë është aplikuar masivisht gjatë muajve të fundit nga kryedemokrati Lulzim Basha i cili ka sponsorizuar thuajse çdo postim të tij në rrjetet sociale. Por përveç tij, edhe mjaft funksionarë të tjerë të “selisë blu” po përdorin këtë strategji marketingu duke bërë një fushatë të paguar.
/Gazetareforma.com/
