Stuhia e fuqishme që ka përfshirë vendin krijoi momente paniku në Portin e Durrësit. Trageti i linjës Durrës–Bari “Francesca”, i ankoruar në kalatë dhe gati për nisje, u përball me këputjen e njërit prej litarëve që e mbante të lidhur. Për disa minuta, anija rrezikoi të shkëputej nga pozicioni i saj mes dallgëve të forta.
Autoriteti Portual Durrës njoftoi se situata u bë kritike, por ndërhyrja e menjëhershme e Kapitenerisë së Portit, strukturave portuale dhe rimorkiatorit të Agjencisë së Shërbimit Detar shmangu një aksident të mundshëm. Me manovra të shpejta, trageti u sigurua sërish dhe u rilidh me kalatën.
Vetëm pas kësaj ndërhyrjeje urgjente, “Francesca” arriti të nisej drejt Barit, ndërsa autoritetet theksuan se pavarësisht motit të keq, transporti detar po monitorohet në çdo moment për të garantuar sigurinë e pasagjerëve.
