Ditën e sotme 6 persona të cilët furnizonin Tiranën me drogë kanë rënë në prangat e policisë.
Bëhet me dije se të arrestuarit shpërndanin lëndë narkotike në sasi të vogla, në zona të ndryshme të Tiranës.
Ndërkohë që gjatë kontrolleve fizike ndaj këtyre shtetasve, në vende të ndryshme, shërbimet e policisë iu kanë gjetur dhe sekuestruar, në cilësinë e provës materiale, sasi lënde të dyshuara narkotike, të llojit kokainë dhe cannabis sativa, të ndara në doza.
Njoftimi i policisë:
Tiranë
Goditen, nga Seksioni për Hetimin e Narkotikëve, 6 raste të veprimtarisë kriminale në fushën e narkotikëve.
Vihen në pranga 6 shtetas. Sekuestrohen doza kokaine dhe kanabisi.
Specialistët e Seksionit për Hetimin e Narkotikëve, në vijim të punës për goditjen e paligjshmërisë, bazuar në informacionet e marra në rrugë operative se disa shtetas shpërndanin lëndë narkotike në sasi të vogla, në zona të ndryshme të Tiranës, kanë organizuar punën me qëllim kapjen e tyre.
Në vijim të veprimeve u arrestuan në flagrancë, për veprën penale “Prodhimi dhe shitja e narkotikëve”, shtetasit:
– D. Xh., 38 vjeç, A. S., 30 vjeç, D. (A). B., 44 vjeç, F. D., 22 vjeç dhe S. B., 24 vjeç, të pestë banues në Tiranë dhe O. H., 23 vjeç, banues në Fier.
Gjatë kontrolleve fizike ndaj këtyre shtetasve, në vende të ndryshme, shërbimet e Policisë iu kanë gjetur dhe sekuestruar, në cilësinë e provës materiale, sasi lënde të dyshuara narkotike, të llojit kokainë dhe cannabis sativa, të ndara në doza.
Materialet i kaluan Prokurorisë, për veprime të mëtejshme procedurale.
