Një ngjarje e rëndë ka tronditur Spanjën, pas ndarjes nga jeta të trajnerit spanjoll Fernando Martín dhe tre fëmijëve të tij, si pasojë e fundosjes së një varke turistike në brigjet e Indonezisë.
Fernando Martín ishte trajner i ekipit Valencia CF Femenino B. Ai po udhëtonte me familjen dhe persona të tjerë pranë destinacionit turistik Labuan Bajo, kur varka ku ndodheshin u përfshi nga një aksident detar fatal. Në bord ndodheshin gjithsej 15 persona.
Sipas autoriteteve lokale, shtatë persona arritën të shpëtonin, mes tyre edhe katër anëtarë të ekuipazhit. Gruaja e Fernandos, Andrea, si edhe vajza e tyre shtatëvjeçare, Mar, janë mes të mbijetuarve dhe ndodhen jashtë rrezikut për jetën.
Klubi i Valencias reagoi me një deklaratë zyrtare, ku shprehu dhimbjen dhe ngushëllimet për humbjen e trajnerit dhe tre fëmijëve të tij, duke konfirmuar se ngjarja është raportuar nga autoritetet indoneziane.
“Jemi thellësisht të pikëlluar nga ndarja nga jeta e Fernando Martín, trajner i Valencia CF Femenino B, dhe tre fëmijëve të tij, pas një aksidenti tragjik detar në Indonezi, siç është konfirmuar nga autoritetet lokale. Në këtë moment jashtëzakonisht të vështirë, klubi shpreh ngushëllimet më të sinqerta dhe mbështetjen e plotë për familjen, miqtë dhe kolegët e tij.”
