Paratë e marra nga studentët në këmbim të notës, duket se kanë qenë “harram” për pedagogun e tyre që kishte gjetur një mënyrë të “thjeshtë” për të bërë para.
Gjykata e Posaçme Anti-Korrupsion ka vendosur sot që të lërë në burg pedagogun e universitetit “Fan Noli” në Korçë, Alket Dino.
Ai akuzohet se, merrte para nga studentët në shkëmbin të notave kaluese. Në burg është lënë edhe Xhevi Dervishi, i cili dyshohet se bënte rolin e sekserit mes tij dhe studentëve, që jepnin ryshfet për të marrë notë kaluese.
Seanca e sotme në gjykatë ka zgjatur më shumë se 2 orë, pasi avokatët e dy të arrestuarve kanë kërkuar kohë për t’u njohur me aktet dhe provat e paraqitura nga Prokuroria.
Teksa jepej vendimi, në hyrje të kësaj gjykate ndodheshin edhe familjarët e të arrestuarve, të cilët u shprehën për mediet se, për këtë çështje do të flasë drejtësia. “S’kemi asgjë për të thënë, do të flasë drejtësia. Nuk ka lidhje asgjë me çfarë thuhet”,- u shprehën ata.
Ndërkohë, sapo furgoni që shoqëronte pedagogun u fut në Gjykatë, ata nisën duke shprehur fjalë mbështetëse: “Drejtësia do të fitojë, jemi me ty Alket”.
Dosja hetimore
Në dosjen hetimore janë zbardhur përgjimet telefonike dhe ambientale, prej nga ku mësohet se të dyshuarit kanë komunikuar me njëri-tjetrin.
Sipas dosjes në momentin që sekseri merrte paratë nga studentët, pedagogu bënte ndryshimet e notës.
Nga SPAK janë sekuestruar edhe provimet e studentëve ku ka rezultuar se, ata që jepnin përgjigje pa dhënë një ryshfet nuk merrnin notë kaluese.
Në radhët e studentëve Alket Dino ishte kthyer në “tmerr”, për shkak të notave që vinte në provime. Në sezonin e vjeshtës ai kishte kaluar vetëm 5 studentë.
Skema e korrupsionit
Alket Dino dhe Xhevi Dervishi u arrestuan pranë Fakultetit, teksa iu gjetën edhe një sasi prej 300 eurosh dhe 50.000 lekë, të cilat nga hetimet e kryera dyshohet se i kanë përfituar në mënyrë të kundërligjshme nga studentët, të cilat u sekuestruan në cilësinë e provës materiale.
Skema e korrupsionit mes pedagogut dhe sekserit është zbardhur brenda pak ditëve nga SPAK. Mësohet se në momentin që sekseri u merrte lekët studentëve, pedagogu u ndryshonte këtyre të fundit notën.
Prokuroria si provë materiale të vlefshme për hetimin ka edhe provimet e disa studenteve, pasi ka rezultuar që edhe ata që kishin dhënë përgjigje për pyetjet nuk kishin marrë notë kaluese.
Pas arrestimit Xhevi Dervishi pranoi fajësinë, pasi tha se, paratë i ndante përgjysmë me profesorin, por më pas nuk foli më. Ndërsa pedagogu Dino, që prej arrestimit nuk e ka pranuar në asnjë moment fajësinë dhe përfshirjen në skemën korruptive për të cilën e akuzon SPAK.
/ GazetaReforma.com/
