Shefi i Urgjencës Kombëtare, Skënder Brataj ka folur lidhur me situatën e pandemisë së COVID-19 në vendin tonë. Brataj i ftuar në A2 është shprehur se i druhet sjelljeve të reja të virusit, por edhe uljes së vigjilencës nga qytetarët dhe moszbatimi i masave të vendosura anti-COVID. Ai ka thënë se të gjithë do të donim që të ishim në fund të pandemisë, por deri në këto momente kemi kaluar më të keqen.
“Do të donim të gjithë që të ishim në fund të pandemisë, por deri tani mund të themi se kemi kaluar më të keqen. Por përderisa pandemia ekziston dhe virusi është mes nesh, duhet treguar kujdes. Edhe në vendet e tjera i kemi parë ulje ngritjet e të dhënave të pandemisë”, tha Brataj për A2.
Më tej ai ka vazhduar duke thënë se ky sezon dp të jetë më i qetë sepse shumica e qytetarëve janë vaksinuar ose një pjesë e konsiderueshem e kanë kaluar sëmundjen.
Ndërsa për turistët që do të vijnë nga shtete problematike në lidhje me pandeminë, do të aplikohen teste të shpejta, nëse kanë simptoma të ngjashme me Covid-19.
“Do të hapen qendrat shëndetësore tani më 15 qershor dhe këtë vit kemi shtuar në to dhe testet e shpejta nëse do të ketë persona me simptoma”, shtoi Brataj.
