Një arsenal armësh dhe municioni luftarak është zbuluar i fshehur në një ndërtesë të braktisur në lagjen “Hajro Çakërri” të Vlorës.
Gjatë një kontrolli të befasishëm nga Policia e Vlorës, bazuar në të dhëna të siguruara nga inteligjenca policore, në katin e dytë të godinës u gjetën të murosura dy armë zjarri automatike, 12 granata difensive pa ndezës, 14 ndezës granatash të mbështjellë me letër dhe rreth 2200 fishekë luftarakë.
Sipas njoftimit zyrtar, të gjitha armët dhe municioni janë sekuestruar dhe do t’i nënshtrohen ekspertimit në Institutin e Policisë Shkencore, për të verifikuar nëse janë përdorur më parë në ngjarje kriminale.
Ndërtesa ku u gjetën armët rezulton në pronësi të një 67-vjeçari me inicialet Gj. K., banues në të njëjtën lagje. Ai është proceduar penalisht në gjendje të lirë, për shkak të moshës dhe gjendjes shëndetësore.
Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm në Vlorë, për hetime të mëtejshme.
