Biznesmeni problematik Trifon Murataj, pronari i famshëm i kompanisë “Bana King”, është shpallur sërish në kërkim nga policia e Durrësit. Kësaj here jo për kontenierët e dyshimtë që nisin nga Ekuadori drejt Shqipërisë, por për një incident të rëndë në ambientet e kompanisë së tij, ku një punonjës humbi shikimin e njërit sy.
Ngjarja e rëndë, e cila u mbajt e fshehtë për pesë ditë të plota nga kompania, ndodhi më 19 shkurt kur punonjësi 48-vjeçar A.G. u dëmtua rëndë teksa po hapte arkat e bananeve në kontenier. Një bisturi e përdorur për të çarë paketimet e frutave i goditi syrin, duke i shkaktuar dëmtime të pariparueshme që çuan në humbjen e plotë të shikimit.
Sipas burimeve, drejtuesit e kompanisë kanë tentuar ta mbajnë ngjarjen të fshehtë, duke deklaruar fillimisht para policisë se “punonjësi nuk ka njoftuar” dhe se “ishte larguar me një koleg në klinikë private”. Por klinika nuk pranoi ta trajtonte 48-vjeçarin, i cili më pas iu drejtua spitalit shtetëror të Durrësit. Vetëm atëherë, institucionet shëndetësore njoftuan policinë, e cila nisi hetimet për rrethanat e ngjarjes.
Skandali u bë edhe më i madh kur Inspektorati i Punës konstatoi se punonjësi ishte punësuar pa dokumentacionin përkatës, duke rezultuar në një gjobë të konsiderueshme për kompaninë.
Shpallja në kërkim e Muratajt për veprën penale “Shkelja e rregullave të mbrojtjes në punë” vjen pas një historie të gjatë me aktivitetin e kompanisë së tij. Një person me lidhje të dokumentuara me trafikun e drogës të vazhdojë të operojë lirisht në Shqipëri, madje duke u reklamuar publikisht në çdo kanal televiziv.
Sipas dokumenteve të autoriteteve amerikane anti-drogë (DEA), që nga viti 2014, kompania “Bana King” ka qenë nën vëzhgim të vazhdueshëm si një kanal potencial për trafikimin e kokainës nga Amerika e Jugut në Evropë. Më 9 nëntor 2014, policia e Ekuadorit sekuestroi 33.55 kg kokainë në një kontenier të kompanisë me destinacion Durrësin. Pavarësisht informimit të menjëhershëm të autoriteteve shqiptare nga DEA, asnjë veprim konkret nuk u mor.
Historia u përsërit në 2021, kur u zbuluan 119 kg kokainë në një tjetër kontenier të “Bana King”. Rezultati? Vetëm disa arrestime të figurantëve të vegjël, ndërsa Murataj as nuk u thirr për pyetje.
Ndërsa arkat “humbisnin” në mënyrë misterioze, prezenca mediatike e “Bana King” vetëm rritej. Reklamat e kompanisë mbushnin ekranet televizive, me fytyra të njohura që konkurronin për të promovuar bananet që, sipas autoriteteve amerikane, shërbenin si kamuflazh për një rrjet ndërkombëtar kokaine.
Murataj, pavarësisht dëshmive të shumta që e lidhin me trafikun ndërkombëtar të drogës, ka arritur të operojë i papenguar për një dekadë të plotë. Madje edhe tani, kur është shpallur në kërkim për një incident që rezultoi në dëmtimin e rëndë të një punonjësi, duket se autoritetet shqiptare janë të ngadalta në përgjigjen e tyre.
Sipas njoftimit zyrtar të policisë së Durrësit, Murataj është shpallur në kërkim që prej datës 18 shkurt, por deri më tani nuk ka asnjë informacion për lokalizimin apo arrestimin e tij. Burime nga policia bëjnë me dije se “vijon puna për kapjen e tij”, por nuk japin detaje të mëtejshme.
Mënyra se si Murataj ka arritur të shmangë hetimet serioze dhe të vazhdojë biznesin e tij pavarësisht provave të forta për përfshirje në aktivitete kriminale ngre pyetje të thella për rrjetin e tij të ndikimit në institucionet shqiptare.
