Shërbimi i Çështjeve të Brendshme dhe Ankesave i ka referuar Prokurorisë hetimin paraprak ndaj veprimeve të dy efektivëve të Policisë, pasi akuzohen se kanë reaguar me vonesë për të ndaluar një të dyshuar për krime seksuale.
Ky rast është kallëzuar nga një burrë dhe vajza e tij 15-vjeçare, të cilët pretendojnë se specialistët e hetimit pas kallzimit për ngacmimin e adoleshentes , nuk e kishin referuar për dhunë seksuale por për kanosje.
Sipas Top Channel shtetasi O. N., u referua për hetim për akuzën e dhunës seksuale, por rrethana qe rëndon oficerët është pikëpyetja se përse menjëherë pas ngjarjes i riu u lejua te largohej ne shtëpi, për tu arrestuar tre ditë me vonë.
Të akuzuarit deklarojnë se pasi kishin administruar kallzimin nga vajza dhe i ati, kanë marrë mendimin e prokurorit se si duhet te vepronin.
Ata shprehen se prokurori i ka udhëzuar në telefon ta pyesnin jo si person nën hetim por si person që ka dijeni për rrethanat e ngjarjes dhe për këtë shkak pasi morën deklaratën e tij e lanë të lirë për ta arrestuar pas ankesave të të dëmtuarve.
Si ndodhi ngjarja?
15 vjeçarja kishte dalë gjatë karantinës për vrap në Dajt, kur iu ndërpre rruga nga një motorist që e ftoi ta shoqëronte, por kur vajza refuzoi ai e ndoqi në këmbë për gati 30 metra.
Më pas iu afrua dhe kur ajo tentoi të bërtasë, i mbylli gojën dhe e preku në vende intime.
Megjithatë, vajza mundi të shkëputet prej tij dhe i doli para një makine policie që po patrullonte në zonë duke kërkuar ndihmë, por oficerët që e shoqëruan në komisariat thanë se një vajzë e panjohur u kërkoi ndihmë, kurse ata që kryen veprimet e mëpasshme dyshohet se nuk kanë patur të njëjtën shpejtësi gjatë ushtrimit të detyrës.
Oficerët me inicialet me O.F. dhe A. N., dyshohen të kenë vepruar ne këtë mënyrë pasi mund të kenë patur si synim të lehtësojnë gjendjen e të dyshuarit, një i ri 22 vjeçar.
Dyshimet që bien mbi ta janë ato të shpërdorimit të detyrës.
