Buxheti i Ministrisë së Brendshme për vitin 2021 fryhet për shkak të rritjes së personelit. “Projektbuxheti i vitit 2021, si i tillë shënon një rritje…në raport me vitin 2020, prej 1.5 %, pra është vetëm 20.9 miliard lekë”, deklaron ndër të tjera ministri Sandër Lleshaj gjatë prezantimit të bërë sot, në Komisionin për Sigurinë Kombëtare.
“Viti 2020 shënoi rritje të rëndësishme në numrin e punonjësve të Policisë së Shtetit, numër i cili pësoi një shtesë të konsiderueshme falë mbështetjes së qeverisë. Në harkun e pothuajse 7 viteve e gjysmë Policia e Shtetit është shtuar me 1700 vetë, në periudhën e qeverisjes tonë. Ndërkohë që 700 prej tyre janë shtuar në vitin e fundit, apo një vit e gjysmë të fundit”, tha ministri.
Përveç shtimit numerik të Policisë së Shtetit, gjatë vitit 2020, Leshaj raportoi se, janë shtuar një seri kapacitetesh të munguara të saj, janë krijuar njësi të reja si: Njësia “Shqiponja”, Njësia e “OFL-së” etj. Njësitë “Shqiponja”, janë krijuar në të gjitha qarqet e vendin, pra struktura të posaçme operacionale në të gjitha qarqet e vendit, një strukturë e re, e munguar.
“Janë shtuar edhe disa njësi të tjera të specializuara të cilat plotësojnë gamën e kapaciteteve të Policisë së Shtetit, Njësia “E”, njësia e luftës kundër krimit ekonomik, Njësia “K”, njësia e kapjes së personave në kërkim, Njësia “I”, që është njësia e inteligjencës policore, është shtuar Njësia “C”, që është njësia kundër krimit kibernetik, ose kompjuterik”, deklaroi Lleshaj.
“Tek Garda e Republikës kemi një rritje modeste prej 2 %, e cila kryesisht është rritje në shpenzime personeli. Ju thashë edhe në fillim që Garda e Republikës për shkak të përgjegjësive të reja të marra në kuadër të garantimit të sigurisë personale të stafit, të sistemit të drejtësisë: gjykatësve, prokurorëve, magjistratëve, ka pësuar një shtesë në numrin e personelit të saj dhe kjo shtesë personeli reflektohet edhe në një shtesë buxheti të Gardës” informoi Lleshaj në Komisionin e Sigurisë.
/GazetaReforma.com/
