Protesta e opozitës ka nisur dhe sipas informacioneve të para theksohej, se protesta e opozitës jokuvendore do të zhvendosej pas kryeministrisë edhe në Komisionin Qendror të Zgjedhjeve. Për të përjashtuar rrezikun ky institucion është boshatisur në këto momente.
Kryetari Klement Zguri anëtarët e KQZ, por edhe gjithë administrata janë larguar, edhe pse afati ligjor për dorëzimin e dokumentacioneve për regjistrimin e kandidatëve për kryebashkiakë dhe këshilltarë për zgjedhjet vendore është deri në mesnatë. Sipas burimeve të “report. tv” theksohet se pranë KQZ-së ka vetëm forca policie në rast se PD-ja dhe LSI-a do të tentojnë të shkojnë drejt këtij institucioni. Nga informacione jo zyrtare pranë PD-së thuhej se do të kishte një plan për të penguar bllokimin e procedurës ligjore për regjistrimin e kandidatëve.
Zyra tjetër e protokollit është hapur në një vend tjetër, i cili nuk tregohet për arsye sigurie. Përfaqësues politikë që do duhet të dorëzojnë dokumentacionet e fundit për zgjedhjet vendore të 30 qershorit 2019, do të duhet të lidhen me personin e kontaktit të KQZ-së, i cili i orienton drejt vendit ku është çelur zyra e protokollit. Mësohet se Partia Socialiste këtë pasdite i ka dorëzuar të gjitha dokumentacionet, duke regjistruar të gjithë kandidatët për kryebashkiake dhe të gjithë këshilltarët bashkiakë.
