Franca do t’i nderojë në mënyrë të veçantë punëtorëve shëndetësorë të cilët kanë humbur jetën nga Covid ndërsa luftonin pandeminë, tha të premten Presidenti francez Emmanuel Macron. Ai tha se një status i quajtur “vdiq në shërbim të republikës” do të krijohej për të nderuar punonjësit publikë që humbin jetën “në rrethana të jashtëzakonshme”.
Një status i ngjashëm “vdiq në shërbim të kombit” tashmë ekziston për policinë dhe ushtrinë, ndërsa “vdiq për Francën” është rezervuar për ushtarët dhe civilët e vrarë në betejë.
“Unë dua që ne t’i japim mirënjohjen tone me një themel të fortë ligjor,” tha Macron në një postim video në Twitter.
Statusi i ri do të lejojë që fëmijët e të ndjerit do të jenë nën kujdesin e shtetit me të drejtën për të marrë mbështetje materiale dhe morale nga qeveria, tha ai. Statusi aktual i rezervuar për ushtrinë dhe policinë u jep të drejtë fëmijëve që ata lënë pas për ndihmë financiare për arsimim dhe trajnim në punë, përfshirë shkollimin dhe bursat falas.
Statusi i ri u drejtohej atyre që “në mes të pandemisë kujdesen për jetën e të tjerëve”, tha Macron, duke e quajtur statusin e ri “një akt drejtësie dhe vëllazërie”. Rrethana të tjera që do t’i jepnin një nëpunës publik statusin përfshijnë vdekjen gjatë operacioneve të shpëtimit ose manovrave ushtarake.
