Policia ka mundur që të vërë në pranga ditën e sotme Albin Hoxhën, 35-vjeçarin që dyshohet si autori i atentatit të mbetur në tentativë ndaj biznesmenit Andon Dhima.
Hoxha ka qenë ish-komando dhe ka shërbyer si ushtar në repartin special të ushtrisë Zall-Herr, përgjatë viteve 2006-2007.
Për shkak të përvojës si ish-komando, Hoxha njihet si profesionit në përdorimin e armëve, ndërkohë që fotot e kamerave të sigurisë që ka pikasur personat që ndoqën më 15 tetor biznesmenin Dhima, e tregojnë qartë këtë akt të mbetur në tentativë.
Kamera e instaluar nga vetë administratori i pallatit, ka shërbyer për të pikasur të rinjtë që janë vënë në pranga.
Sipas policisë, Albin Hoxha dhe Mariglen Matohiti, të dy të lënë në burg, janë zbuluar pikërisht nga kamerat në hyrjen kryesore të pallatit, teksa hyjnë dhe më pas janë filmuar sërish teksa dalin, por këtë herë jo me maska plastike dhe kapele, por të zbuluar totalisht nga fytyra.
Për arrestimin e tyre mësohet se, agjentët e komisariatit nr.2 në Tiranë kanë zgjedhur një skemë shumë delikate, pasi i kanë marrë në telefon duke u prezantuar si banorë të lagjes dhe se u nevojitej që të zbrisnin poshtë pallatit për t’ia hapur rrugën, pasi i kishin bllokuar me makinë.
Sapo ish-komandoja Albin Hoxha dhe shoku i tij, Grid Lenon, kanë zbritur nga apartamenti dhe kanë hipur në makinë, me qëllim hapjen e rrugës, menjëherë policia ka vepruar duke i pohuar se ishin të arrestuar.
“Një skemë e tillë u ndoq pasi kishim të dhëna se Albin Hoxha dhe Grid Lenon, ishin persona të armatosur dhe kishin përgatitje profesionale më armët e zjarrit. Ndaj zgjodhëm një skemë të tillë për ti futur në kurth, duke menduar të prezantojnë agjentët si banorë të lagjes. Dy objektivët tonë kanë zbritur të qetë nga pallatit dhe pa armë, dhe sapo janë futur në makinat përkatëse, është kryer ndërhyrja nga ana jonë…”,– tregon një burim pranë policisë së Tiranës.
Ndërkohë, edhe dy personat e tjerë që kanë qenë në rol bashkëpunimi si vëzhgues janë arrestuar në banesat e tyre.
Burimet pranë policisë pohojnë se, grupet hetimore deri në këtë fazë të hetimit kanë konstatuar se këta individë janë shtyrë nga një grup kriminal në Tiranë, për të kryer ekzekutimin e biznesmenit Andon Dhima, pikërisht në hyrje të pallatit që ai vetë ka ndërtuar në zonën e stadiumit “Selmas Stërmasi”.
Sot janë lënë në burg, të katër të arrestuarit, Albin Hoxha, Mariglen Matohiti, Grid Lenon dhe Enea Hoxha. Përpara mediave, foli motra e Matohitit dhe njëkohësisht gruaja e Grid Lenon, e cila publikoi edhe një video.
Gerta Matohiti pretendon se, natën që ishte planifikuar për t’u kryer krimi, më 15 tetot, Matohiti, vëllai i saj, ishte në punë si kamerier në lokalin që ajo vetë administron, “Vila e Peshkut”.
Ndërsa Grid Lenon, ishte në një festë ditëlindjeje. Matohiti ka denoncuar gjithashtu edhe dhunën që ka pësuar nga policia, pas shoqërimit në komisariat dhe faktin që e kishin kërcënuar se do ta arrestonin si bashkëpunëtore.
/GazetaReforma.com/
