Spitalet janë futur sërish nën presionin e numrit të lartë të të infektuarve që vijnë në derën e tyre, ndërkohë që kapacitetet janë shumë të kufizuar në krahasim me pacientët e sëmurë.
Është fjala për Italinë e cila po përballet këto ditë sërish me një gjendje kaotike për shkak të valës së dytë të koronavirusit.
Sipas mediave të huaja, shtimi i rasteve të reja me Covid-19, ka bërë që spitalet italiane të jenë sërish nën presion.
Disa foto që janë publikuar nga mediat vendase, po bëjnë tashmë xhiron e rrjetit. Në foto shihet radhë të gjata autoambulancash me pacientë Covid, që presin të hyjnë në spital.
Aktualisht mediat raportojnë se, situata është kritike në të gjithë Gadishullin Apenin.
Në Torino, një foto e publikuar portretizon kolonën e ambulancave me sirenat e fikura, që kthehen rreth orës 10 të mbrëmjes në “Corso Dante”, në fund të shërbimit të tyre.
Ndërsa në Foggia, një linjë e gjatë e automjeteve të urgjencës, po pret përpara spitalit.
Italia është një nga vendet më të prekura në Evropë, ku prej fillimit të pandemisë deri më tani kanë humbur jetën 51,306 njerëz dhe janë infektuar 1,455,022 të tjerë.
/Burimi: ANSA/ GazetaReforma.com/
