FMN ka publikuar dy raporte për Shqipërinë, duke analizuar zhvlerësimin e monedhave të huaja dhe ndërhyrjen në tregun valutor, si dhe duke vlerësuar qëndrueshmërinë e bankave përballë goditjeve të mundshme.
Në raportin e parë, FMN thekson se Shqipëria ka përjetuar një forcim të qëndrueshëm të lekut, i cili është nxitur kryesisht nga faktorë ekonomikë të fortë, si investimet e huaja. Politika e normës së interesit konsiderohet si instrumenti kryesor për ruajtjen e stabilitetit të çmimeve.
Megjithatë, në rastet kur forcimi i lekut vjen nga faktorë jo-themelorë, si perceptimi i rrezikut nga investitorët e huaj, ndërhyrjet në tregun valutor mund të jenë të dobishme për të zbutur ndikimin negativ mbi inflacionin dhe rritjen ekonomike.
FMN sugjeron që ndërhyrjet në tregun valutor të përdoren vetëm në situata të jashtëzakonshme, pasi mund të sjellin pasoja anësore, si rreziqe për bilancin e bankës qendrore, dobësim të politikës monetare dhe ngadalësim të zhvillimit të tregjeve financiare. Rekomandimi është që autoritetet shqiptare të lejojnë fleksibilitet më të madh në kursin e këmbimit dhe të mbështeten kryesisht në politikën e normës së interesit për të ruajtur stabilitetin ekonomik.
Në raportin e dytë, FMN vlerëson se sektori bankar në Shqipëri ka kaluar një transformim të rëndësishëm, falë performancës ekonomike dhe reformave të shëndosha financiare. Megjithatë, identifikohen ende disa problematika, disa prej të cilave janë evidentuar edhe gjatë Programit të Vlerësimit të Sektorit Financiar (FSAP) të FMN-së në vitin 2014.
Raporti tregon se bankat janë të qëndrueshme ndaj goditjeve nga kreditë e këqija dhe normat e interesit. Sidoqoftë, janë gjetur vulnerabilitete të rëndësishme, veçanërisht në lidhje me ekspozimet ndaj huamarrësve të mëdhenj dhe borxhit sovran, të cilat mund të paraqesin rreziqe për sektorin.
FMN rekomandon forcimin e mëtejshëm të masave makroprudenciale dhe thellimin e tregjeve financiare, për të përmirësuar qëndrueshmërinë e sektorit bankar dhe për të përballuar sfidat e ardhshme.
