Vatrat e zjarrit në disa vende vazhdojnë të jenë aktive dhe duke u favorizuar nga temperaturat e larta po përhapen me shpejtësi. Vatrat e zjarrit në Mamurras vazhdojnë të jenë aktive dhe bëhet me dije se së fundmi në terren kanë ardhur zjarrfikëset e Krujës dhe Laçit, ndërkohë që i është kërkuar ndihmë edhe zjarrfikësve të Lezhës dhe të Mirditës.
Sipërfaqja e djegur në këtë zonë është e madhe, ndërsa flakët vazhdojnë të avancojnë me shpejtësi. Situata ka ardhur duke u përkeqësuar se në orët e pasdites, ku u regjistruan dhe vatrat e para.
Vatra të shumta zjarri janë ndezur në të gjithë vendin, e ende vijojnë të jenë aktive, paçka se forca të shumta zjarrfikëse, janë në përpjekje për të neutralizuar flakët. Vlora, është një nga qytetet e prekura nga zjarret. Orikumi po ashtu është në një situat kritike, pasi flakët po avancojnë me shpejtësi dhe shtëllunga të mëdha tymi duken duke u lëshuar në ajër.
Mijëra ha tokë është shkrumbuar nga flakët, ndërsa situatë e njëjtë po shfaqet në shumë vende të Evropës, përfshirë Turqinë, Italinë dhe Greqinë.
Kujtojmë se ditën e djeshme ministri i Mbrojtjes, Niko Peleshi tha se situata më kritike paraqitet në Karaburun, Shijak, Përmet dhe Fier. Gjithashtu ai iu ka bërë thirrje qytetarëve që të kenë kujdes në zonat ku për shaka të thatësirës dhe temperaturave të larta paraqitet rrezik për zjarr.
