Pandemia e Covid-19 vijon ende të shtojë rastet e reja të të infektuarëve, teksa në prag festash, qeveria ka marrë masa në pikën kufitare të Morinës. Në këtë sezon, ku lëvizja në këtë pikë është tejet e lartë për shkak të festave, qeveria ka vendosur një personel mjekësor për verifikimin e certifikatave të vaksinimit për qytetarët që kthehen nga shtetet e perëndimit për festat e fundvitit.
Ndërkohë shteti i Kosovës, ka ngritur një qendër vaksinimi, për t’iu ardhur në ndihmë qytetarëve që ta kryejë këtë proces në kufi dhe për të shmangur kthimet e tyre për shkak të mungesës së pasaportës së vaksinimit. Gjatë paradites së sotme, është shënuar një fluks i lartë i lëvizjeve në pikën e përbashkët kufitare të Morinës, por jo radhë të gjata, kjo për shkak të masave lehtësuese gjatë kontrollit nga policia kufitare, e cila ka udhëzime të veçanta në prag festash.
Udhëtarët që përdorin këtë pikë kufitare, kryesisht janë emigrantë që kthehen për festat e fundvititi, e për të cilët ky vit ishte i pazakontë për shkak të pandemisë. Ndërkohë vetëm gjatë ditës së sotme kanë kaluar kufirin më shumë se 6300 qytetarë e 3120 automjete. Puna e personelit mjekësor vijon normalisht, ndërsa çdo gjë po shkon sipas rregullave të caktuara.
