Në kulmin e sezonit turistik, pikat kufitare të Shqipërisë me Greqinë po përballen me një numër të lartë hyrjesh, teksa emigrantët dhe turistët kthehen në vend për të kaluar pushimet verore.
Sipas të dhënave zyrtare, vetëm gjatë datës 10 gusht, në pikën kufitare të Kapshticës kanë hyrë 7,449 shtetas, ndërkohë që 4,837 të tjerë kanë dalë nga vendi. Edhe Qafë-Thanë ka regjistruar një fluks të ngjashëm, me 5,551 hyrje dhe 4,988 dalje brenda së njëjtës ditë.
Për shkak të fluksit në rritje, kolona të gjata automjetesh janë krijuar në segmentin rrugor nga pala greke drejt kufirit shqiptar, ku në disa raste radhët kanë arritur deri në 2 kilometra. Situata është përkeqësuar edhe nga temperaturat e larta që dominojnë gjatë mesditës, duke vështirësuar ndjeshëm pritjen për udhëtarët, përfshirë familje me fëmijë, të moshuar dhe turistë të huaj.
Në pikën kufitare të Qafë Botës, autoritetet shqiptare po punojnë me tre sportele aktive për të përshpejtuar procedurat e kalimit, ndërsa pala greke operon me vetëm dy sportele, çka po shkakton vonesa të konsiderueshme në këtë segment.
