Urgjenca pediatrike në spitalin rajonal të Shkodrës po përballet me një rritje të ndjeshme të vizitave. Shefja e repartit, mjekja Greta Naraçi, bën të ditur se vetëm gjatë fundjavës numri i fëmijëve që kanë kërkuar ndihmë mjekësore ka arritur deri në 160 në ditë.
Sipas saj, shkak i këtij fluksi është një virozë që po qarkullon aktualisht në vend dhe prek kryesisht të vegjlit, por edhe të rriturit. Virusi shoqërohet me temperatura të larta që zgjasin disa ditë, si dhe me simptoma të tjera si të vjella dhe diarre.
Mjekja thekson se shumica e pacientëve që paraqiten janë fëmijë të familjeve emigrante që kanë ardhur në Shqipëri gjatë verës. Ajo i bën thirrje prindërve të tregojnë kujdes dhe të mos përdorin antibiotikë pa rekomandim mjekësor, pasi kjo mund të sjellë komplikacione serioze.
Naraçi thekson se temperaturat e larta të ditëve të fundit kanë ndikuar gjithashtu në shtimin e rasteve, duke e bërë situatën më të vështirë për personelin shëndetësor të pediatrisë në Shkodër.
