Nën masa të rrepta sigurie, i veshur me të zeza, me pranga në duar dhe kokën ulur, Florenc Çapja ka mbërritur në orën 17:00 në aeroportin “Nënë Tereza” të Rinasit. I shumëkërkuari ndërkombëtar është ekstraduar nga Dubai, ku ishte fshehur prej rreth 8 vitesh. Pamjet filmike të bëra publike tregojnë momentin kur ai shoqërohet nga forcat RENEA dhe operacionale të Drejtorisë së Përgjithshme të Burgjeve, të cilat e morën në dorëzim sapo preku tokën shqiptare.
Florenc Çapja, 44 vjeç, është dënuar me burgim të përjetshëm nga Gjykata e Posaçme për vrasjen në vitin 2012 të babë e bir, Nezir dhe Gentian Beqiri, ngjarje e ndodhur në banesën e tyre në qytetin e Elbasanit. Sipas dosjes hetimore, Çapja dyshohet si porositës i kësaj vrasjeje, ndërkohë që bashkë me të është dënuar me të njëjtën masë edhe xhaxhai i tij, Ardian Çapja, i njohur si kreu i një grupi kriminal me ndikim në Elbasan.
Sipas Prokurorisë së Posaçme (SPAK), dëshmia kyçe në këtë çështje është ajo e të penduarit të drejtësisë, Ervis Bardhi, i cili deklaroi se vrasja u porosit nga Florenc dhe Ardian Çapja për një shumë prej 50 mijë eurosh. Bardhi u dënua me 15 vite burg, ndërsa Olsi Leku, i cilësuar si ekzekutor, u dënua me burgim të përjetshëm. Dy të tjerë të përfshirë, Klajdi Dokoli dhe Etjen Cani, janë dënuar me nga 25 vite burgim secili.
Pas shpalljes së dënimit, SPAK ka vijuar hetimet duke vendosur sekuestro mbi disa pasuri të familjes Çapja dhe po verifikon lidhjet e tyre të dyshuara me krime të tjera të ndodhura në Elbasan.
Florenc Çapja, tashmë i vendosur në një burg të sigurisë së lartë, do të vuajë dënimin e përjetshëm për krimet për të cilat është shpallur fajtor. Policia e Shtetit dhe partnerët ndërkombëtarë vlerësojnë këtë ekstradim si një sukses në luftën kundër krimit të organizuar dhe kapjen e personave me rrezikshmëri të lartë shoqërore.
