Florenc Çapja, i akuzuar dhe i kërkuar për vrasjen e babë e bir, Nezir dhe Gentian Beqirit, ka fituar lirinë në Dubai. Që prej datës 12 korrik 2021, Emiratet e Bashkuara Arabe kanë vendosur heqjen e të gjitha kufizimeve ligjore ndaj Florenc Çapjas. Kjo do të thotë se që prej asaj datë, ai është i lirë për të lëvizur brenda vendit dhe drejt vendeve të tjera.
Ndërkohë, Çapja i ka dërguar një e-mail Gjykatës së Posaçme për Korrupsionin dhe Krimin e Organizuar në lidhje me çështjen që po zhvillohet ndaj tij në Shqipëri, ku ka kërkuar që çështja e tij të mos veçohet nga ajo e xhaxhait të tij, Ardian Çapjas dhe të pandehurve të tjerë. 40-vjeçari ka thënë në email se ka marrë dijeni për çështjen dhe kërkon që të gjykohet bashkë me xhaxhanë e tij. Ndërkohë, mësohet se pas marrjes së emailit, GjKKO ka vendosur që të shtyjë seancën dhe pritet të dërgojë një letër-porosi në Dubai për të verifikuar nëse emaili është dërguar nga Çapja apo jo.
Për çfarë akuzohet Florenc Çapja?
Florenc Çapja akuzohet si organizator dhe porositës i vrasjes së Nezir dhe Gentian Beqirit, babë e bir, në vitin 2012 në Elbasan. Ngjarja ndodhi në 15 gusht në shtëpinë e Gentian Beqirit. Ky i fundit ishte në “arrest shtëpie”, pasi akuzohej si i përfshirë në vrasjen e Sokol Çapjas (vëllai i Ardian Çapjas). Autorët përdorën Etjen Canin për të hyrë brenda banesës, pasi ai ishte shok fëmijërie me viktimën.
Për vrasjen e Gentian dhe Nezir Beqirit janë arrestuar deri tani Olsi Leka, vetë Etjen Cani dhe Ervis Bardhi, i cili ka treguar ngjarjen si bashkëpunëtor i drejtësisë dhe ka rrëfyer se vrasja ishte porositur nga Florenc dhe Ardian Çapja, i cili është gjithashtu i arrestuar.
