Pas publikimit të shkrimit të djeshëm të VOA dhe BIRN, duket se media është duke lëvizur për këtë çështje. Mbrëmjen e sotme e ftuar në Opinion, gazetarja Klodiana Lala, e cila edhe ka shkruar artikullin, ka thënë se prokurorët kanë frikë nga krimi i organizuar dhe kjo e bën të jetë në ditën që është sot. Gazetarja ka thënë se Prokuroria e Krimeve të Rënda nuk ka vullnetin që ta çojë deri në fund çështjen e shitblerjeve të votave.
“Unë e kam nisur shkrimin tim me një përshkrim të zyrave të prokurorëve të cilëve u kam vajtur zyrtarisht në emër të BIRN-it dhe kam kuptuar që në Prokurorinë e Krimeve të Rënda ka një hamulli. Personalisht mendoj që ai institucion nuk ka vullnetin ta hetojë çështjen deri në fund, sepse sipas meje personat e përfshirë janë persona të pushtetshëm, sipas mendimit tim modest”, tha Lala.
Ndërsa e pyetur për lidhjet që kanë këta persona, Lala ka thënë se përveç pushtetit, frikë kanë edhe nga organizatat e krimit të organizuar.
“Po, kanë frikë krimin e organizuar sepse ai zotëria i dënuar me 16 vite burg është liruar nga gjykata e lartë me një kartelë mjekësore, sepse ka çrregullime dhe ka tentativa suiçidale. Pra i ka shpëtuar burgut për vrasje, si mendoni ju, ai zotëri nuk do t’i shpëtojë burgut për shitje votash?”, deklaroi ajo.
