Ditën e enjte emri më i lakuar ka qenë ai i Linda Ramës dhe i Abi Bank dhe pikërisht për këtë arsye ka reaguar edhe drejtuesi i kësaj banke.
Shumë akuza janë artikuluar ndaj bashkëshortes së kryeministrit Rama dhe Abi Bank, ndaj dhe Andi Ballta, drejtori i kësaj banke në Shqipëri, iu ka kthyer përgjigje. Këto akuza Ballta i cilëson politike dhe i drejtohet pa të drejtë kësaj banke, e cila nuk ka lidhje fare me afera.
“ABI Bank është investimi më i madh amerikan i të gjitha kohërave në Shqipëri dhe NCH Capital është një nga investitorët e huaj më të rëndësishëm në rajon dhe më gjerë. Është për të ardhur keq që pasionet politike nuk kursejnë as sektorë sensitivë si ai bankar, apo investitorë të kalibrit ndërkombëtar si NCH Capital.”
Ballta ka sqaruar më tej se ABI Bank nuk është një bankë që funksionon në Amerikë, por bankë e investitorëve amerikanë në Shqipëri. Po kështu ka informuar edhe si funksionon lista e aksionerëve.
“Për të shmangur çdo keqinterpretim: Ne nuk jemi bankë në Amerikë por bankë e investitorëve të mirënjohur amerikanë në Shqipëri. NCH Capital është me qendër në Nju Jork dhe ka pothuaj 30 vjet eksperiencë investimi global.
NCH Capital nuk ka pasur kurrë asnjë pjesëmarrje kapitali rus, apo të ndonjë kombësie tjetër në strukturën e aksionerëve të ABI Bank. NCH thjesht ka investuar kapital tërësisht Amerikan në Rusi dhe në Evropën Lindore. Gjithashtu të gjithë aksionerët e ABI Bank janë të listuar publikisht dhe të aprovuar sipas të gjitha rregullave nga autoritetet rregullatore shqiptare që në vitin 2010.”
Gjithashtu Ballta, i ka kthyer përgjigje edhe akuzave ndaj Linda Ramës, e cila ka pasur aksione në këtë bankë, ai ka sqaruar se ajo ska pasur asnjehere aksione, po ka qenë këshilltare e bordit drejtues.
“Linda Rama nuk ka qenë asnjëherë dhe nuk është aksionere apo zotëruese opsionesh të ABI Bank. Linda Rama ka qenë një anëtare e pavarur e Bordit. Zonja Rama ka qenë për tre vjet në Bordin e ABI Bank. Arsyeja pse Linda u ftua në Bord është për aftësitë e saj profesionale, njohjes time profesionale me të që në 1993, dhe nivelit të lartë të sofistikimit që një investitor i sofistikuar si NCH kërkon të ketë në Bordin e tij”
Po kështu z. Ballta ka sqaruar edhe faktin pse ABI Bank është e regjistruar si kompani offshore.
“Regjistrimi offshore nuk ka të bëjë me vendndodhjen e investitorëve. Një investitor amerikan mund të regjistrohet në një vend ku sistemi i taksave është më i favorshëm. Nuk ka asgjë ilegale apo të parregullt si në legjislacionin Shqiptar apo dhe atë ndërkombëtar me regjistrimin offshore të investitorëve në momentin kur investitorët janë të deklaruar.”, përfundon sqarimin z. Ballta.
