Tashmë dy partitë kryesore të opozitës kanë marrë një vendim unanim, djegien e mandateve dhe në bazë të këtij vendimi ka folur edhe raportuesi për Shqipërinë në Parlamentin Evropian, Knut Fleckenstein.
Për Fleckenstein duket se nuk është ndonjë situatë e jashtëzakonshme, pasi kjo nuk është hera e parë që opozita e vendit tonë kërkon të ndërmarrë një hap të tillë.
Sipas tij, situata në këtë drejtim nuk ka asnjë ndryshim në këto 5 vitet e fundit.
“Nuk është për herë të parë që po përballemi me këtë situatë, që opozita shqiptare të heqë dorë nga puna në parlament. Sipas mendimit tim, asgjë nuk ka ndryshuar gjatë 5 viteve të fundit në këtë drejtim. Është detyra e opozitës për të ofruar një alternativë ndaj politikës aktuale në Parlament dhe nëse ata e konsiderojnë të nevojshme edhe jashtë Parlamentit. Në fund të ditës, çdo anëtar i Parlamentit vendos nëse ai ose ajo dëshiron të heqë dorë nga mandati i dhënë nga populli “, ka thënë Fleckenstein, për AbcNews.
