Italianët zgjdhën të djathtën në këto zgjedhje të përgjithshme duke iu dhënë një fitore historike atyre. Tshmë ajo që mbetet e paqartë është formimi i kabinetit qeveritar, pra kush do të drejtojë çfarë? Koalicioni i Qendrës së Djathtë, është i përbërë nga Fratelli d’Italia, Forza Italia dhe Lega Nord ku kryesuese është partia e drejtuar nga Giorgia Meloni e cila kryeson bindshëm me mbi 26% të votave. Meloni do të jetë e para kryeministre grua që do të drejtojë Italinë dhe në lidhje me formimn e kabinetit qeveritar ajo është shprehur se “kompromise dhe përfshirje në lojëra s’do të ketë për qeverinë”.
Referuar mediave italiane, Meloni është konsultuar me besnikët e saj për emrat që do të përfshijë në postet kyçe ministrore dhe direktivat janë që të rrëzohen pritshmëritë e Salvinit dhe ambiciet e Berlusconit, por gjithmonë duke shmangur krijimin e telasheve.
Edhe pse ajo ka nguruar të flasë publikisht për emrat, hipoteza të tilla si Ministria e Brendshme për Salvinin, apo presidenca e Senatit për Berluskonin nuk pritet të merren në konsideratë.
Liderja e Fdi pritet të mos dorëzohet përballë partnerëve të koalicionit për pikat e programit dhe për përmbushjen e premtimeve të pamundura, e as për kërkesat e ministrave për të krijuar probleme.
“Ne jemi njerëz seriozë, ofrojmë bashkëpunim maksimal por kemi arritur deri këtu dhe nuk duam të humbasim fytyrën. Ministrat nuk shkojnë në qeveri për të fryrë llogaritë bankare”, besohet të ketë qenë mesazhi që Meloni u ka drejtuar të vetëve.
Dhe teksa flasim për Salvinin, duket se përjashtimi i tij nga postet qeveritare nuk është e keqja më e madhe për liderin kontrovers të Lega Nord, pasi zërat kundër tij në parti kanë nisur të dalin në pah, duke vendosur theksin te rezultati zhgënjyer me mbi 8.5% të votave të grumbulluara.
Kështu, ish-sekretari i Ligës së Veriut, Roberto Maroni, teksa ka komentuar rezultatin e zgjedhjeve ka thënë se është koha për një lider të ri.
“Flitet për një kongres të jashtëzakonshëm të Lidhjes. Do të dija kë të zgjidhja si sekretar të ri. Por tani për tani nuk do të përmend asnjë emër”, shton më pas ai.
Ndërkohë, sa i përket qeverisë zërat janë se aleatëve të Fdi mund t’u jepet presidenca në Palazzo Madama, ndërsa Departamenti i Ekonomisë pritet t’i besohet një tekniku, ndoshta jo Panetës për të mos ndikuar mbi Bankën e Italisë dhe raportin me Bankën Qendrore Evropiane, pasi situata ekonomike është “jashtëzakonisht e vështirë”.
