Bayern Munchen fitoi Superkupën e Gjermanisë ndaj rivalëve të përjetshëm, Borussia Dortmund, me rezultatin 3-1. Ishte trofeu i parë për trajnerin Julian Nagelsmann në krye të bavarezëve. Trajneri 33-vjecar ua dedikoi trofeun lojtarëve dhe ish-trajnerit, Hansi Flick, pasi sipas tij ishin ata që bënë të mundur që Superkupa të vinte në Mynih.
Mesfushori i kampionëve të Gjermanisë, Joshua Kimmich, nuk ngurroi ta ngacmojë trajnerin e tij, duke thënë: “I treguam Nagelsmannit menjëherë se ai nuk është te Leipzig këtu, por te Bayern! Këtu ka mundësinë të fitojë çdo finale”, u shpreh Kimmich.
Edhe legjenda e portës, Oliver Kahn, tashmë drejtues te Bayern, u shpreh se trajneri është në vendin e duhur për të fituar, duke parë që në sezonet e fundit ai nuk ja kishte dalë të shijonte trofe me Leipzig: “Julian është në vendin e duhur, ashtu si edhe ne. Kemi zgjedhur trajnerin e duhur për të pasur sa më shumë suksese.
Jam i sigurt që ky nuk do të jetë i fundit për të, pasi kështu dhe ne do të na duhej të qëndronim gjatë pa trofe, diçka që është e paimagjinueshme për një klub si Bajerni i Mynihut”, tha ish-kapiteni i bavarezëve, Oliver Kahn pas fitimit të Superkupës së parë të tij me klubin bavarez si drejtor ekzekutiv.
