Shqipëria është duke luftuar betejën aktuale me koronavirusin dhe e gjithë vëmendja është përqendruar tek ajo, por probleme më serioze janë lënë më një anë.
Një nga betejat e përditshme jo vetëm të shëndetësisë në vendin tonë, por kryesisht të grave dhe vajzave është kanceri i gjirit, një nga sëmundjet më të përhapura që u merr çdo vit jetën dhjetëra nënave e grave.
Statistikat tregojnë se 1 në 8 gra preken nga kanceri i gjirit. Zafire Panxhi, punon si infermiere pranë qendrës shëndetësore të fshatit Shlecan në Elbasan, sot tregoi betejën e saj me kancerin e gjirit.
Nëse Zafirja do të kishte bërë kontrollin e përvitshëm tek mamografia mund t’i kishte shpëtuar tmerrit të kimioterapisë që i hoqi gjirin dhe i rrëzoi flokët. Zafirja ka vendosur historinë e saj, për t’i treguar grave shqiptare se sa e rëndësishme është mamografia.
Zafire Panxhi, Infermiere: “Në vitin 2018 unë kisha dhimbje gjoksi, shkova dhe bëra një eko aty mu komunikua që isha e prekur nga kanceri I gjirit. Për sigurinë time bëra dhe një mamografi të njëjtën gjë më thanë edhe aty.
Kishë bërë ndonjëherë mamografi në jetën tende?
Jo, e kisha neglizhuar. Kur shkova tek ekoja dhe mamografia u prezantova si infermiere nuk kishte gjë më të keqe se sa kur të komunikohej direkte që ti je me kancer. E tmerrshme.
Ti je nëna e dy djemve, po atyre si ua komunikove?
Sapo doja nga ekoja mora dy djemtë dhe burrin në telefon dhe I thash jam me kancer. Nuk e besonin nuk reaguan. Por unë e pranova jam me kancer dhe do e mposht ketë sëmundje. Më pas shkova tek onkologjiku në Tiranë aty me operuan dhe më hoqën gjoksin. Unë kam bërë kimioterapi, hormonoterapi dhe ia dola ja ku jam. Të gjitha grave u them që të bëjnë eko ose mamografi pasi aty mund të maresh vesh nëse e ke ose jo, mund të jesh në kohë të shpëtosh veten”.
Covid 19, duket se i ka trembur gratë të bëjnë një mamografi, edhe pse ambient dezifektohet çdo ditë dhe reparti i mamografi gjatë muajt tetor ka punuar me orar të zgjatur, përsëri numri i zonjave që ekzaminohen është shumë i ulët.
“Në tetor të 2020 numri i grave që kanë bërë mamografi këtu ka qenë shumë i vogël krahasuar me atë të vitit 2019. Covid-19 i ka frikësuar gratë. Por unë i ftoj që të marrin 30 minuta kohë nga koha e tyre, njëherë në vit dhe të vijnë e të bëjnë mamografinë”,- deklaron Dasantila Tahiraj, Drejtore e Spitalit “Xhaferr Kongoli” në Elbasan.
/Burimi: TCh/ GazetaReforma.com/
