Shqipëria i kishte sytë te Luiza Gega, me atleten shqiptare që garoi sot në “Tokyo 2020”. Atletja kuqezi zbriti në pistën e stadiumit të Tokios për finalen e madhe në garën e 3000 metrave me pengesa. Luiza Gegae mbylli garën në vendin e 13-të, me kohën 9.34.10
Në fakt, ishte një turne historik për atletikën tonë, pasi për herë të parë një atlete nga Shqipëria mori pjesë në finalet e Lojërave Olimpike. Luiza Gega arriti të siguronte një vend mes 15 atleteve më të mira të botës, falë një paraqitjeje të shkëlqyer të bërë në kualifikueset.
Atletja 32-vjeçare regjistroi kohën 9.23.85 në kualifikuese, duke u pozicionuar e pesta në baterinë 2 dhe e 11-ta në renditjen e përgjithshme, në një garë ku konkurruan 41 atlete. Kujtojmë se kualifikimi për në finale ishte edhe objektivi kryesor që kishte Luiza Gega për në “Tokyo 2020”.
Konkurrenca mes 15 finalisteve ishte shumë e madhe dhe kohët ishin dukshëm më të mira se të Gegës. Garën e fitoi Peruth Chemutai nga Uganda, me kohën 09.01.45. Podiumi u plotësua nga amerikanja Courtney Frerechics dhe Hyving Kiyen nga Kenia.
Në xhiron e parë, Gega ishte në vendin e 16-të, ndërsa në 1 mijë metrat e dyta, rikuperoi një pozicion dhe kaloi e 15-ta. Ndërsa në 1000 metrat e fundit, arriti të rikuperojë edhe dy pozicione të tjera, duke e mbyllur e 13-ta.
