Lidhjet e shqiptarëve me kartelet e Amerikës Latine po dalin në pah çdo ditë. Një operacion i finalizuar nga policia e Uruguajit, e cila ka arritur të kapë dhe sekuestrojë një sasi prej 444 kilogramë kokainë në Tacuarembo. Droga ishin hedhur nga një avion i vogël që po fluturonte mbi zonën e Rincón de Zamora, Montevideo Chico, pranë Route 59. Më pas lënda narkotike u transferua në një kamion që transportonte dru zjarri. Në prana kanë rënë 2 drejtuesit e mjetit të tonazhit të rëndë, një 24-vjeçar dhe një 36-vjeçar. Gjithashtu, u arrestua një 20-vjeçar, i cili ishte përgjegjës për t’i njoftuar se ku kishte rënë droga që ishte hedhur nga avioni. Operacioni ishte i koduar ‘Albania’, por ende nuk dihet nëse të arrestuarit janë shqiptarë apo jo.
Referuar Prokurorisë, 20-vjeçari tashmë është dënuar për asistencë në veprimtarinë e trafikut të drogës, ndërsa dy drejtuesit e mjeteve janë akuzuar për transport droge. Është caktuar masa e sigurimit prej 120 ditësh. Prokurori Ferrero raportoi se fermat u bastisën në Soriano, Rivera dhe Montevideo. Në një konferencë për shtyp, Richard Saravia, shefi i policisë së Tacuarembó, tha se kjo është një sekuestrim rekord për departamentin dhe e theksoi atë si diçka historike.
Sipas Guillermo Maciel, nënsekretar i Ministrisë së Brendshme, kokaina e sekuestruar kap vlerën e tre milionë e gjysmë dollarëve në tregun vendas: “Po të ndahej në doza në tregun kombëtar, arrin në shtatë milionë dollarë” dhe “E njëjta drogë e vendosur në Europë është 15 milionë dollarë”. Nënsekretari tregoi se droga me shumë gjasa nuk do të qëndronte aty, pasi ishte e cilësisë së pastër. Deri më tani nuk dihet se nga vinte kokaina. Aktualisht policia po heton për zbardhjen e plotë dhe identifikimin e grupit kriminal.
