Skandal tjetër me mish të kontaminuar trondit Shqipërinë: këtë herë 4.5 ton fileto derri me salmonelë, të importuara nga kompania “Frigo ALBA”, dyshohet se janë futur në treg në vend të asgjësimit, ndërkohë që Autoriteti Kombëtar i Ushqimit (AKU) jep deklarata kontradiktore dhe refuzon të publikojë prova.
Sipas një investigimi të “Ora News”, 4516.75 kilogramë fileto derri e infektuar me salmonelë është futur në Shqipëri nga kompania importuese “Frigo ALBA”, e administruar nga Luan Jazexhiu dhe Ledio Koka. Edhe pse AKU ka pretenduar se ky mish do të asgjësohej, dokumentet dhe veprimet e mëvonshme hedhin dyshime serioze mbi këtë proces.
AKU me dy versione për të njëjtin asgjësim
Në një përgjigje zyrtare, AKU ka deklaruar se procesi i asgjësimit është realizuar më 23 prill. Por vetëm gjashtë ditë më vonë, më 29 prill, institucioni ka dhënë një tjetër version, duke thënë se procedura nuk ishte finalizuar ende. Kjo mospërputhje hedh hije dyshimi mbi transparencën e këtij institucioni dhe seriozitetin e veprimeve të tij.
Për më tepër, AKU refuzon të vërë në dispozicion të mediave apo publikut materiale vizuale (foto apo video) që provojnë groposjen e mishit, ndërsa sipas Agjencisë Kombëtare të Mjedisit (AKM), subjekti “Frigo ALBA” nuk ka paraqitur fare kërkesë për asgjësim.
Sipas procedurave ligjore, Inspektorët e Mjedisit duhet të jenë të pranishëm gjatë groposjes së çdo sasie mishi të infektuar, por në këtë rast ata kanë deklaruar se nuk kanë qenë të njoftuar dhe nuk kanë dijeni për ndonjë proces të tillë.
Tentativë për ta hedhur në treg mishin me salmonelë
Burime të tjera pohojnë se janë bërë përpjekje që mishi me salmonelë të mos groposet, por të shitet në treg me çmim nën kosto. Në mungesë të çdo prove për asgjësim, ekziston rreziku real që ky mish të jetë konsumuar nga qytetarët.
Skandali merr përmasa më të rënda në dritën e një helmimi masiv të ndodhur në kopshtin nr.1 në Gramsh. Nga 79 fëmijë të analizuar, Instituti i Shëndetit Publik ka konfirmuar se 17 kanë rezultuar pozitivë me bakterin ‘Salmonella Enteritidis’. Ky fakt nxit dyshime të forta për një lidhje të mundshme me mishin e infektuar.
Një histori që përsëritet: Pas mishit të pulës, tani dhe fileto derri
Kjo është hera e disatë që Shqipëria përballet me mish të kontaminuar me salmonelë. Vetëm dy muaj më parë, një tjetër skandal u zbulua pas konsumit të rreth 15.000 kilogramëve mish pule të infektuar me “Salmonella Typhimurium”. Mishi ishte importuar nga Brazili dhe mbërriti në Portin e Durrësit më 11 mars. Analizat pranë ISUV më 21 mars konfirmuan praninë e bakterit, por deri atëherë mishi ishte shpërndarë dhe konsumuar.
Në këtë rast, përgjegjës për shpërndarjen ishin kompanitë “diMal” dhe “AMG FOOD”.
Institucionet në heshtje, qytetarët në rrezik
Ndërsa rasti i mishit të pulës kaloi pa pasoja penale për asnjë prej kompanive të përfshira, situata me “Frigo ALBA” rrezikon të ndjekë të njëjtin skenar. Në mungesë të përgjegjësisë institucionale dhe transparencës, qytetarët mbeten viktima të një sistemi të dobët kontrolli ushqimor.
Skandalet e përsëritura me produkte të kontaminuara kërkojnë urgjentisht hetim të thelluar dhe përgjegjësi të qarta ligjore. Pa masa konkrete, siguria ushqimore në Shqipëri mbetet në mëshirë të fatit.
