Ditën e sotme u njoftua se do të firmoset marrëveshja 6 milion dollarëshe në funksion te 2 satelitëve që kryeministri Rama i ka pasur “fiksim” prej kohësh.
Teksa vendi ynë ndodhet në krizë dhe qytetarët në gjendje të mjerueshme ekonomike, deputeja e PD-së Tabaku e konsideron si absurd këtë veprim të qeverisë. Tabaku ka deklaruar se Kryeministri Edi Rama i kërkon shqiptarëve të bëjnë sakrifica, ndërkohë që vetë shpërdoron taksat.
Në një postim në Twitter, Tabaku nuk i ka kursyer ironitë mbi marrëveshjen e nënshkruar në kryeministri për monitorimin me teknologji të avancuar të territorit të Republikës së Shqipërisë ndërmjet Agjencisë Kombëtare të Mbrojtjes Civile dhe Operatorit “Satellogic USA Inc.
Tabaku tha se Rama ka premtuar satelitë për të verifikuar ndërtimet pa leje.
Kujtojmë se ministri i Mbrojtjes Niko Peleshi deklaroi sot se dy satelitët Albania 1 dhe Albania 2 do të përdoren fillimisht për një periudhë 3-vjeçare. Para një viti Rama premtoi se Shqipëria do të ketë “syrin” e saj në hapësirë dhe duket se po e realizon në një kohë krize, ku çmimet kanë prekur “tavanin” dhe janë të papërballueshme.
Postimi i plotë:
ER ka premtuar satelitë për të verifikuar ndërtimet pa leje. Çudi si na duhet 150 km mbi tokë për të parë diçka që dallohet lehtësisht mes Tiranës. Justifikim cinik për tenderin me vlerë 5.7 mln € në këtë kohë, kur i kërkon shqiptarëve sakrifica dhe vetë shpërdoron taksat e tyre!
