Këtë fundjave Fieri ka arritur shifrat rekord të qytetarëve të infektuar me Covid-19. 109 raste të reja, nga të cilat 18 janë shënuar vetëm në Mallakastër, kanë nxitur dhe kontrolle të rrepta nga ana e policisë së Fierit.
Uniformat blu klanë dalë me patrulla në rrugë jo vetëm duke këshilluar kalimtarët për vendosjen e maskës, por edhe në ndëshkimin e tyre me masë administrative. Vetëm gjatë orëve të para të kësaj të diele policia Fier ka penalizuar me gjoba 58 kalimtarë.
Cdo ditë në Fier vendosen mesatarisht 30-40 gjoba për mungesë të maskës, ndërkohë që sot policia është treguar më e ashpër, duke parë edhe papërgjegjshmërinë e qytetarëve, dhe sidomos të rinjve, në zbatimin e vendimit për vendosje të maskës.
Një ditë më parë Fieri ka shënuar numër të lartë infektimesh nga Covid-19. Sipas shifrave të fundit nga ISHP numri i infektimeve shkon në total në 2883 raste.
Ajo cka bie në sy, është numri i lartë mes pensionistëve dhe të papunëve, por ndërkohë pozitivë me Covid kanë rezultuar edhe punonjës institucionesh dhe kompanive private.
Ndërkohë, ka nisur edhe vaksinimi i mjekëve dhe infermierëve, ndërsa dozën e parë të vaksinës e kanë marrë tashmë edhe banorët e shtëpisë së të moshuarve dhe stafi i saj.
