Kryeplaku i fshatit Kuturaqe në GRamsh ka rënë në prangat e policisë, pasi akuzohet për shpërdorim detyre. Ai dyshohet se nuk ka kallëzuar një rast të kultivimit të kanabisit nga shtetasi A.D., 31 vjeç, i cili është shpallur në kërkim.
Njoftimi i policisë:
Gramsh
Vijon kontrolli i territorit për parandalimin, evidentimin dhe goditjen e kultivimit të bimëve narkotike.
Vihet në pranga kryeplaku i fshatit Kuturqare në Gramsh, për shpërdorim detyre.
Shpallet në kërkim autori i dyshuar i kultivimit të bimëve narkotike.
Në vijim të kontrolleve të zhvilluara në territor, bazuar dhe në informacionet e marra në rrugë operative, shërbimet e Komisariatit të Policisë Gramsh kanë konstatuar në pronën private të shtetasit A. D., në fshatin Kuturqare në Gramsh, fidanë kanabis të kultivuar në gota plastike, gati për t’u mbjellë në tokë.
Në vijim të veprimeve, specialistët për Hetimin e Krimeve në Komisariatin e Policisë Gramsh bënë ndalimin e shtetasit G. Sh., 53 vjeç, banues në fshatin Kuturqare Gramsh, me detyrë kryeplak i fshatit, si dhe shpalljen në kërkim të autorit të dyshuar për kultivim të bimëve narkotike, shtetasit A. D., 31 vjeç, banues në Elbasan. Vijon puna intensive për kapjen e tij.
Materialet i kaluan Prokurorisë, për veprime të mëtejshme, për veprat penale “Shpërdorim detyre”, “Moskallëzimi i krimit” dhe “Kultivimi i bimëve narkotike”.
