Kryeministri i Shqipërisë, Edi Rama, mëngjesin e kësaj të marte e ka nisur me një urim për të gjithë besimtarët myslimanë që kremtojnë festën e Kurban Bajramit. Kreu i qeverisë ka zgjedhur që urimin e tij ta bëjë përmes një video nga ku shihen pamjet nga Xhamia në Tiranë e Et’hem Beut. “Gëzuar Kurban Bajramin” shkruan Rama, teksa e shoqëron me një emoji të flamurit shqiptar dhe të xhamisë.
Gjithashtu, edhe kryeministri i Kosovës, Albin Kurti, ka uruar të gjithë besimtarët myslimanë për festën e Kurban Bajramit. Kurti përmes një postimi në rrjetin social Facebook, në urimin e tij ka kujtuar mesazhin e kësaj feste, që është sakrifica.
“Të dashur besimtarë myslimanë, ju uroj lumturi e gëzim në festën e sakrificës, Kurban Bajramin. Sakrificën që bëhet për qëllim të mirë, e don Zoti, e don edhe shoqëria. Sakrifica e bërë për qëllim të mirë na i gëzon zemrat. Ne humbasim diçka, por fitojmë shumë. Ky është mesazhi i kësaj feste, që ka edhe më shumë domethënie për popujt siç jemi ne, pra jo të mëdhenj e jo të pasur. Me sakrificat tona të përbashkëta, me angazhim e shpresë, me solidaritet e dashamirësi, ne do ta bëjmë Kosovën shtet më të fortë dhe shoqëri më të begatë
Në Kosovë sivjet jemi më të qetë se në vitin e kaluar dhe masat i kemi relaksuar, falë punës së institucioneve të shëndetësisë që kanë siguruar vaksinimin masiv të popullsisë, proces që është në zbatim e sipër. Kështu që, Kurban Bajramin mund ta festojmë ashtu siç është tradita, familjarisht e me miq, por megjithatë, të ruajmë higjienën e distancën sociale, sepse ka vende të botës ku pandemia po rikthehet. Edhe një herë ju uroj, juve e familjeve tuaja, për hajr Bajramin!”, shkruan Kurti.
Ndërkohë mëngjesin e sotëm mijëra besimtarë në të gjithë vendin kanë falur namazin e Kurban Bajramit dhe kanë uruar njëri-tjetrin më shumë paqe e begati.
