Prej 7 prillit të vitit 1939 e deri më 29 nëntor të vitit 1944, Shqipëria ishte e pushtuar nga Italia fashiste dhe pas kapitullimit të saj, në vjeshtë të vitit 1943, Shqipëria pushtohet nga forcat gjermane.
Dita e sotme shënon 76-vjetorin e çlirimit të Shqipërisë nga pushtuesit nazi-fashistë.
Kjo datë edhe pse ka pasur debate të shumta historike dhe politike, gjithsesi është një festë kombëtare në kalendarin tonë, ndaj për pasojë, duhet respektuar dhe cilësuar si e tillë.
Por për shkak të pandemisë, nuk dihet nëse në Shqipëri do të zhvillohen homazhe për dëshmorët e luftës, ndërkohë që as politika nuk ka njoftuar asnjë zhvillim.
Kryeministri Edi Rama, e ka përkujtuar sot 76-vjetorin e Çlirimit me vargjet e Qemal Stafës, të cilat Rama i cilëson si të mençura.
“E vjetra po shembet, kohët po ndryshojnë, një jetë e re po lulëzon gërmadhash”,-citon Rama.
Në fund të nëntorit 1944, pas Çlirimit të Tiranës, më 17 nëntor dhe pjesës kryesore të Shqipërisë së Veriut, mbetej te çlirohej qyteti i Shkodrës dhe qarku i tij.
Shkodra u çlirua më 29 nëntor të vitit 1944, datë kjo e cila shënon ditën e çlirimi të Shqipërisë nga pushtimi gjerman.
Dje në 108-vjetorin e shpalljes së Pavarësisë, festa bëri bashkë në Vlorë Presidentin e vendit, Ilir Meta, kryeparlamentarin, Gramoz Ruçi dhe Kryeministrin, Edi Rama, megjithatë asnjë prej tyre nuk tregoi shenja afrimi ndaj njëri-tjetri.
/GazetaReforma.com/
