Fermerët e prekur nga përmbytjet dhe dëmet e rënda në bujqësi kanë dalë sot në protestë përpara Bashkisë së Maliqit, duke kërkuar dëmshpërblim nga shteti. Ata thonë se përmbytjet kanë shkaktuar humbje të konsiderueshme në prodhimin bujqësor, duke vënë në rrezik të ardhurat dhe mbijetesën e familjeve të tyre.
Sipas protestuesve, situata është bërë e papërballueshme dhe pa mbështetje financiare nuk do të jenë në gjendje të vijojnë aktivitetin bujqësor. Ata kërkojnë reagim të menjëhershëm nga institucionet dhe zgjidhje konkrete për dëmet e shkaktuara.
Protesta po monitorohet nga forca të shumta të Policisë, të cilat janë pozicionuar në hyrje të institucionit për të garantuar rendin dhe sigurinë. Deri më tani nuk raportohet për incidente.
