Drejtoria Rajonale e Veterinarisë dhe Mbrojtjes së Bimëve Tiranë ka vendosur në karantinë një fermë në fshatin Maliq Muço pas ngordhjes së disa shpendëve.
Ferma e vendosur në karantinë i përket kompanisë “Rea’s”. Shërbimi veterinar ka marrë mostra zyrtare dhe i ka dërguar për analizim në Laboratorin e Referencës, ISUV.
Aktualisht strukturat Rajonale të Drejtorisë së Përgjithshme të AKVMB dhe Ministrisë së Bujqësisë dhe Zhvillimit Rural po kryejnë hetimin epidemiologjik të rastit.
Kompania “Rea’s” shpk ka rreth 227,708 krerë shpendësh në total, të mbarështuara në katër kapanone në pularinë e Njësisë Administrative Rashbull dhe një kapanon në Njësinë Administrative Shënavlash, Bashkia Durrës. Sipas informacioneve, janë raportuar dëmtime vetëm në njërin prej kapanoneve.
Autoriteti Kombëtar i Veterinarisë dhe Mbrojtjes së Bimëve ka njoftuar se aktualisht është në fuqi Urdhri për rritjen e masave të Biosigurisë. Autoriteti ka njoftuar 68 subjekte të mbarështimit të shpendëve për angazhimin e tyre në marrjen e masave për biosigurinë në stablimentet e tyre.
Gjithashtu është njoftuar shërbimi veterinar rajonal në rang vendi për rritjen e vigjilencës dhe monitorimin e situatës, si dhe Autoriteti Kombëtar i Ushqimit për rritjen e vigjilencës dhe marrjen e masave të nevojshme.
Shërbimi veterinar dhe autoritetet përkatëse po ndjekin me vëmendje situatën dhe po marrin të gjitha masat e nevojshme për parandalimin e përhapjes së problemit.
