Feride Rushiti dhe Qendra Kosovare për Rehabilitimin e të Mbijetuarve të Torturës (QKRMT) janë nominuar për Çmimin Nobel për Paqe për vitin 2025.
Nominimi është bërë nga deputeti suedez Magnus Jacobsson, i cili e ka vlerësuar kontributin e jashtëzakonshëm të Rushitit dhe QKRMT-së në mbrojtjen e të drejtave të njeriut, ndihmën ndaj të mbijetuarve dhe avancimin e paqes.
Jacobsson, në letrën e tij dërguar Komitetit të Nobelit, theksoi se Rushiti dhe ekipi i saj kanë bërë një punë të jashtëzakonshme për trajtimin e plagëve të luftës dhe ndërtimin e paqes së qëndrueshme në Kosovë dhe më gjerë.
Përpjekjet e tyre për rehabilitimin e viktimave të torturës dhe dhunës seksuale gjatë luftës kanë qenë të rëndësishme për ndërtimin e një kornize ligjore që njeh këto viktima si civilë të luftës, duke i mundësuar atyre qasje në reparacione.
Rushiti, në një reagim, e quajti nominimin një moment të rëndësishëm dhe shprehu mirënjohje për njohjen e punës së saj dhe të QKRMT-së. Ajo e konsideroi këtë si një frymëzim për të vazhduar përpjekjet për të drejtat e të mbijetuarve dhe drejtësinë e pasluftës.
E themeluar në vitin 1999, QKRMT ofron ndihmë mjekësore, psikologjike dhe ligjore për viktimat e torturës, duke promovuar respektimin e të drejtave të njeriut për të gjitha etnitë në Kosovë. Në vitin 2018, Rushiti u nderua me Çmimin për Guximin e Gruas nga Departamenti Amerikan i Shtetit për punën e saj frymëzuese.
Deputeti Jacobsson ka qenë më parë aktiv në propozimet për Çmimin Nobel për Paqe, duke nominuar më 2020 Kosovën, Serbinë dhe SHBA-në për përpjekjet e tyre për dialog. Komiteti i Nobelit pritet të përzgjedhë kandidatët e kualifikuar dhe të shpallë fituesin në muajin dhjetor.
