Ish-kryeprokurori Adriatik Llalla do të akuzohet për mashtrim në plotësimin e deklaratës së pasurisë gjatë kohës që ishte zyrtar. Të dhënat e tij janë përgënjeshtruar nga autoritetet gjermane, ku fëmijët kanë studiuar, ndërsa bashkëshortja e tij ka pasurinë n jë shtëpi me qira.
Prokuroria e Posaçme ka apeluar dërgimin e çështjes së Llallës në gjyq, për pikën e vendimit të shpenzimeve për shkollimin e fëmijëve.
Shkak për këtë është bërë shpenzimi për shkollimin e fëmijëve, dhe deklarimi i pavërtetë i ish-kryeprokurorit për mënyrën e pagesës së shkollës së fëmijëve. Nisur nga kjo, SPAK kërkon ta akuzojë edhe për deklarim të rremë ish-kryeprokurorin.
Pagesa e shkollës
Fëmijët e Adriatik Llallës i kanë ndjekur studimet jashtë vendit, në Shkollën Ndërkombëtare të Bremenit, në vitet 2016-2017 dhe 2017 – 2018.
Letërporosia që erdhi nga autoritetet gjermane për shkollimin e fëmijëve të Adriatik Llallës thotë se: “Pagesa për të dy vitet shkollore në shumën 45 mijë euro është depozituar në llogarinë e shkollës nga gjermania Sabine Jaekel Meyer, këtë shumë ia ka dhënë Adriatik Llalla me qëllim transferimin për llogarinë e shkollës nëpërmjet llogarisë bankare”.
Por Llalla ka pretenduar ndryshe në deklarimin e pasurisë.
Kontrata e qirasë
Në vitin e fundit të drejtimit të Prokurorisë së Përgjithshme, bashkëshortja e Llallës, ka lidhur një kontratë qiraje me gjermanët Nortbert dhe Gabriele Ochmann. Kontrata u lidh me afat njëvjeçar në shumën 1175 euro, veç shumës vjetore te qerasë 14.100 euro dhe shuma e garancisë 3525 euro.
Adriana Llalla, bashkëshortja e Adriatik Llallës e ka paguar shumën sapo lidhi kontratën. Paratë janë dhënë në dorë ndërkohë që ai drejtonte organin e akuzës.
Ndërkaq në 2 maj 2017 shtohet sërish kontrata e qirasë.
Të gjithë këto veprime kanë bërë që prokurorët të dyshojnë se ish-kryeprokurori ka kryer fshehje dhe deklarim të rremë të pasurisë, pasi pas largimit nga detyra ai ka deklaruar shpenzime për pagesën e qirasë në shumën 7050 euro gjatë korrik- dhjetor 2017, por nuk ka deklaruar shpenzimet e tjera për pagesën e qirasë nga janari deri në qershor që u parapagua personalisht prej tij në datën 2 maj.
/Gazetareforma.com/
