Një vendim i paprecedentë ka tronditur botën e sportit shqiptar. Federata Shqiptare e Volejbollit ka pezulluar përkohësisht volejbollisten braziliane të Dinamos, Nayara Ferreira, duke kërkuar që ajo t’i nënshtrohet një testi për përcaktimin e gjinisë.
Ky rast, i pari i këtij lloji në Shqipëri, ka ngjallur reagime të forta nga klubi kryeqytetas, i cili e konsideron vendimin si cenues ndaj dinjitetit dhe integritetit personal të lojtareve.
Në deklaratën zyrtare, klubi “Dinamo” konfirmon pezullimin dhe kërkesën e Federatës, por shprehet i habitur për mënyrën e marrjes së këtij vendimi, duke theksuar mungesën e transparencës dhe të bazës rregullative që mund ta justifikonte një veprim të tillë.
“Lojtarja në fjalë është sportiste me licencë zyrtare të FIVB dhe me karrierë 15-vjeçare ndërkombëtare në disa vende të botës, përfshirë edhe ato të Bashkimit Evropian,” thuhet në reagimin e klubit.
Dinamo thekson se kërkesa për test gjinie prek drejtpërdrejt dinjitetin dhe integritetin personal të një sportisteje dhe krijon paqartësi të mëdha për mënyrën se si trajtohen raste të tilla në sportin modern.
Megjithatë, klubi shprehet se do të bashkëpunojë me institucionet për sqarimin e plotë të çështjes, duke kërkuar që ajo të trajtohet me korrektësi dhe ndjeshmëri.
“Sporti duhet të bashkojë, jo të poshtërojë,” mbyllet deklarata e Dinamos, e cila thekson se do të vazhdojë të mbrojë parimet e transparencës, drejtësisë dhe respektit ndaj individit, si themel të vlerave të sportit.
