FBI ka publikuar foto të autorit të dyshuar për vrasjen e aktivistit dhe politikanit konservator Charlie Kirk, duke ofruar një shpërblim prej 100 mijë dollarësh për informacion që çon në identifikimin dhe arrestimin e tij. Dy fotot tregojnë një burrë të veshur me bluzë të zezë me flamurin amerikan, kapele bejsbolli dhe syze të errëta. Autoritetet pohojnë se nuk kanë arritur ta identifikojnë përmes njohjes së fytyrës apo teknologjive të tjera.
Sipas hetuesve, i dyshuari u ngjit në çatinë e një ndërtese universitare pak para mesditës, përballë vendit ku Kirk ishte planifikuar të fliste. Ai qëlloi njëherë duke e goditur Kirk në qafë dhe më pas u hodh nga çatia, duke u larguar drejt një lagjeje pranë.
Ngjarja tragjike ndodhi në Universitetin e Luginës së Utah-ut, ku Kirk ishte i ftuar në një aktivitet publik. Pas sulmit, Shtëpia e Bardhë bëri thirrje për qetësi, por paralajmëroi masa të forta kundër çdo forme ekstremizmi politik.
Presidenti Donald Trump reagoi menjëherë, duke e quajtur vrasjen “akt brutal” që kërcënon stabilitetin demokratik të vendit.
“Administrata ime do të ndjekë penalisht jo vetëm autorët, por edhe ata që i financojnë dhe nxisin. Kjo përfshin organizata që promovojnë dhunë politike dhe urrejtje kundër konservatorëve,” tha ai në një mesazh video.
Trump e vlerësoi Kirk si një “patriot të palëkundur” dhe paralajmëroi se vendi ndodhet në një moment të rrezikshëm.
“Kjo nuk është më politikë, është luftë për shpirtin e kombit,” deklaroi ai.
Charlie James Kirk, i lindur në Illinois më 1993, ishte themelues i organizatës konservatore Turning Point USA, autor librash dhe drejtues i emisionit “The Charlie Kirk Show”.
Ai njihej për qëndrimet e tij të forta në mbështetje të Partisë Republikane dhe Donald Trumpit, me të cilin kishte një marrëdhënie të ngushtë politike.
Përmes aktiviteteve dhe mediave sociale, ai u shndërrua në një nga figurat më me ndikim të krahut të djathtë amerikan, duke arritur qindra miliona ndjekës dhe miliarda shikime online.
Vrasja e tij ndodhi në një klimë dhune politike në rritje në SHBA. Vetëm disa muaj më parë, një kongresiste nga Minesota dhe bashkëshorti i saj u vranë në shtëpinë e tyre, ndërsa hetuesit zbuluan një listë me gati 70 emra politikanësh në makinën e një të dyshuari. Në një tjetër rast në Kolorado, një burrë përdori pajisje ndezëse kundër protestuesve.
Hetimet për vrasjen e Charlie Kirk vijojnë, ndërsa tensionet në disa qytete amerikane janë rritur me protesta dhe përplasje mes grupeve të kundërta politike. FBI u ka bërë thirrje qytetarëve të japin çdo informacion që mund të ndihmojë në gjetjen e autorit.
