Ditën e sotme në Komisionin e Ligjeve në lidhje me fondet për SPAK-un në buxhetin e vitit 2022, Arben Kraja është ‘viktimizuar’.
Kreu i SPAK-ut deklaroi se institucioni që ai drejton ka pasur probleme financiare pasi herë pas here qeveria i ka ndërprerë fonde të caktuara.
Gjithashtu Arban Kraja u shpreh se nga viti 2023 kjo praktikë e dhunshme nuk duhet të ndodhë më sepse sipas tij ndikon në pavarësinë e institucionit.
“Herë pas here me akt normative është ndërhyrë në buxhetin e SPAK duke ndërprerë fonde të caktuara. Nuk kemi reaguar. E kuptojmë krizën, por duke filluar nga 2023 nuk duhet bërë më një praktikë e tillë, e dhunshme. Nuk duhet të ketë prerje të njëanshme të dhunshme të buxhetit të një institucioni të pavarur sepse mendoj se futet tek kufizimet e pavarësisë së një institucioni për të funksionuar. Në një situatë kur të kemi personelin e plotë do të na detyroni të mos paguajmë dikë, apo të mos bëjmë një punë”, theksoi Kraja.
Por Arben Kraja, si drejtues i një institucioni të rëndësishëm në vend, duhet të paraqesë si problem edhe veprimtarinë e Forcave të Posaçme Operacionale, më në krye Olti Bistrin.
Duhet të përmendim se ai ka në dorë gjithë përgjimet pa të cilat SPAK nuk mund të ndërtojë çështjet hetimore. Bistri jo vetëm që favorizon oligarkun Shefqet Kastrati, por “bombardon” me gjoba dhe penalitete të gjithë ata që nuk i shërbejnë interesave të qeverisë. Në këtë situatë, ku SPAK ka autoritetin që të ndërhyjë duke evidentuar shkeljet dhe duke i dënuar ato, zgjedh të anashkalojë faktet dhe të gjejë pretekste për cilësinë e punës.
Teksa vetë kreu i SPAK bën një “sy qorr” për drejtuesit e korruptuar e ndërkohë ankohet për fondet, rrjedhimisht drejtësia në vend është në nivele të mjerueshme
/Gazeta Reforma
