Në dosjen hetimore ndaj kryebashkiakut Erion Veliaj, i cili është aktualisht nën arrest për disa akuza penale, zbulohet se janë paraqitur faturat fiktive nga disa kompani të lidhura me Ajola Xoxën dhe grupin “Balfin” të Samir Manes.
Sipas hetimeve, një faturë prej 30 mijë eurosh ka pasur përpjekje për të kaluar 20 mijë euro nëpërmjet një transaksioni bankar nga kompania “Arts Lab”, ndërsa pjesa tjetër prej 10 mijë eurosh do të kalonte përmes llogarisë së Marsela Çibukajt.
Pjesë nga Dosja hetimore:
99. Edhe në rastin e një kontrate që duhet të nënshkruhet me kompaninë “Balfin”, shtetësja Adela Kondakçiu pyet shtetasen Ajola Xoxa se nga cila kompani e tyre do të lëshojnë faturën për një shumë prej 30.000 euro. Sipas organit procedues, nuk kuptohet përse këto shtetase diskutojnë mbi opsione në lidhje me shoqëri të ndryshme për lëshimin e një fature, ndërkohë që ky proces duhet të jetë strikt, dhe pa mëdyshje mbi shoqërinë që realisht përmbush shërbimin apo gëzon sponsorizimin, pa lënë shteg për “zgjedhje” post factum. (faqe 808). Në këtë pikë, duket e natyrshme që shtetësja Ajola Xoxa vendos për “zgjedhjet më të leverdishme për të, por që në fakt provohen të jenë fiktive. Kjo shtetase pyet financieren nëse kanë hapësirë tek “Arts Lab” shpk për të lëshuar këtë faturë. Kjo e fundit i përgjigjet se faturën mund ta lëshojnë për 20.000 euro, se përndryshe duhet të kalojë me TVSH. Edhe vetëm ky fakt sipas organit procedues provon fiktivitetin e gjithë këtij mekanizmi, i cili është krijuar në funksion të injektimit të shumave të të hollave në shoqëritë e menaxhuara nga shtetësja Ajola Xoха. (faqe 808-809). Ky fiktivitet provohet edhe më tej në faqen 814, ku shtetësja Ajola Xoxa i komunikon me mesazh zanor bashkëbisedueses (pjesë e komunikimeve) që një pjesë të hollash do të faturohen nga “Arts Lab” shpk dhe një pjesë direkt nga Marsela Çibukaj. Për këtë të fundit, shtetësja Ajola Xoxa i thotë që një pjesë të pagesës do ja kalojë në formë CASH.
