Damian Gjiknuri nuk e përjashton mundësinë që Fatos Nano të jetë një prej kandidatëve të mundshëm për president.
Në një konferencë me gazetarët, Gjiknuri tha se nuk është momenti që tashmë të flitet me emra të përveçëm, edhe pse sipas tij nuk është askush i përjashtuar nga gara.
Të vetmit të përjashtuar nga gara për presidentin janë anëtarët e grupit parlamentar të PS-së, gjë të cilën e ka theksuar më herët dhe kryeministri Edi Rama.
Damian Gjiknuri: Unë këtu nuk jam që të komentoj emra të përveçëm, ne kemi thënë publikisht që ne nuk duam që të jetë nga grupi ynë parlamentar, por mund të jenë akademikë apo ish-politikanë. Identifikimi i emrave në këtë fazë do të ishte gabim. Askush nuk përjashtohet, qoftë edhe emri që përmendët më parë.
Më herët Gjiknuri e konsideroi të papranueshme kërkesën e opozitës, për të bërë pjesë të procesit të zgjedhjes së presidentit edhe faktorin ndërkombëtar në Shqipëri.
Sekretari i përgjithshëm i socialistëve, e bëri të qartë se partia në pushtet nuk do të pranojë asnjë ultimatum të opozitës, sa i takon procesit për zgjedhjen e presidentit.
Si pjesë e mazhorancës ai tha se janë bërë thirrje për dialog ndaj PD dhe se Presidenti i Republikës nuk zgjidhet kurrsesi me ultimatum.
