Kreu i Partisë Republikane, njëherësh dhe deputeti Fatmir Mediu ka bërë një kërkesë për Gjykatën Kushtetuese, duke deklaruar se GJK duhet të ketë pavarësi financiare.
Gjatë fjalës së tij në Komisionin për çështjet Ligjore, Mediu u shpreh se duhet që Gjykata Kushtetuese të ketë autonominë e saj për të ardhur në standardet europiane.
“Duhet qartësuar ky term, pavarësia financiare e Gjykatës Kushtetuese për rolin që ka kjo gjykatë për veprimet e kuvendit dhe qeverisë. Kjo i jep autoritetin e duhur Gjykatës Kushtetuese. Për sa kohë është vënë me ligj duhet definuar qartë kush është autoriteti i Gjykatës Kushtetuese”, deklaroi Mediu në komision ditën e martë.
Më tej ai tha se, mungesa e një pavarësi financiare prish rendin e funksionimit të shtetit. Sipas deputetit Fatmir Mediu, nëse nuk i jepet autoritet kësaj gjykate nuk mund t’i jepet asnjë institucioni tjetër.
“Mungesa e saj prish rendin e funksionimit të shtetit. Besoj se duhet të biem dakord. Më shumë se të flasim për krijimin e dinjitetit duhet të arrijmë që këtë institucion ta sjellin në standardet europiane. Nëse nuk i japim autoritet Gjykatës Kushtetuese nuk mund t’i japim asnjë institucioni tjetër”, tha më tej Mediu.
Kujtojmë që një nga nenet e ligjit për organizimin dhe funksionimin e Gjykatës Kushtetuese shpreh se GJK gëzon pavarësi të plotë organizative, administrative e financiare për realizimin e detyrave të caktuara në Kushtetutë dhe në këtë ligj.
