Pasi në mediat sociale qarkulloi një video ku dukej një 17-vjeçar që bëntë manovra të rrezikshme dhe drif në mes të qytetit, policia e Fierit është vendosur në ‘aksion’.
Bëhet me dije se është proceduar penalisht i riu me inicialet E.N, i cili akuzohet për veprën “Drejtimi i automjetit në mënyrë të parregullt”. Por nuk mbetet me kaq pasi nga hetimet rezulton se mjeti është drejtuar pa leje edhe nga pronar, babai i 17-vjeçarit, shtetasi A. N., 53 vjeç, banues në Ndërnënas, Fier.
Njoftimi i policisë:
Procedohet penalisht edhe pronari i automjetit (babai i drejtuesit), pasi rezultoi se kishte drejtuar automjetin, pa leje drejtimi.
Pas publikimit të një videoje në rrjetet sociale, në të cilën shfaqej një automjet tip “Citroen”, drejtuesi i të cilit po bënte drift dhe manovra të rrezikshme, në vendin e quajtur “Rotondo e sharrës”, Fier, shërbimet e Policisë Rrugore Fier bënë të mundur identifikimin e drejtuesit të automjetit.
Në vijim të veprimeve, specialistët e Sektorit të Qarkullimit Rrugor në DVP Fier referuan materialet në Prokurori dhe nisi procedimi penal për shtetasin E. N., 17 vjeç, banues në Ndërnënas, Fier, për veprën penale “Drejtimi i automjetit në mënyrë të parregullt”, pasi ka bërë drift dhe manovra të rrezikshme, me automjetin tip “Citroen”, të cilin e drejtonte pa leje drejtimi.
Gjithashtu, nga hetimet rezultoi se automjeti është drejtuar pa leje drejtimi edhe nga pronari, shtetasi A. N., 53 vjeç, banues në Ndërnënas, Fier (babai i 17-vjeçarit), për të cilin filloi gjithashtu procedimi penal për veprën penale “Drejtimi i automjetit në mënyrë të parregullt”.
Materialet i kaluan Prokurorisë, për veprime të mëtejshme procedurale.
