Sektori fason është prekur shumë për shkak të rënies së euros dhe eksporteve në vendin tonë, duke ndikuar kështu edhe në vendin e punës.
Lidhur me këtë shqetësim madhor për ekonominë në vend, janë mbledhur përfaqësues të shoqatës “Pro Eksport Albania” bashkë me përfaqësues të fasonerive për të diskutuar se çfarë hapash mund të ndjekin.
Ishte kreu i shoqatës Edvin Prençe, ai që njoftoi se vetëm në 48 orët e fundit janë larguar nga puna mbi 1200 punonjëse, i cili e dha këtë njoftim gjatë takimit me pronarët e fabrikave të veshjeve dhe këpucëve në Krujë.
“Vetëm nga dita e djeshme deri më sot kemi 1200 vende të shkurtuara. Shumica prej tyre, gra, nëna familjesh që kanë humbur vendin e punës. Po flasim për zona rurale që nuk ka aktivitete të tjera ekonomike”, tregoi i kreu i pro-eksport.
Ata u shprehen se shumë prej punonjësve në fasoneri kanë kërkuar protestë kombëtare, ndërsa kanë rrëfyer se vitin që shkoi kanë hasur problem të mëdha me pagat.
Kriza e lartë financiare sipas “Pro Eksport Albania” ka prekur rreth 75 mijë punonjës në të gjithë vendin.
