Kryeministri Edi Rama, në një takim me fermerët e zonës së Moravës në Bashkinë Dimal, ka folur edhe për fashat orare, të vendosura nga Komiteti Teknik i Ekspertëve, për të frenuar pandeminë e COVID-19. Banorë të zonës janë shprehur se orari i vendosur deri në orën 20:00, është pak i cunguar e për këtë arsye i kanë kërkuar kryeministrit zgjatjen e fashës orare.
Rama nga ana tjetër është shprehur se të shumta janë kërkesat për zgjatjen e fashës orare, por sipas tij jemi në një situata që nuk duhet të nxitohemi, pasi situata është delikate. Kryeministri shtoi se mund të diskutohet një mundësi për zonat rurale, gjithashtu ai theksoi se ndalimi i orareve të natës është bërë për zonat më të populluara, ku aplikohet e ashtuquajtura “jeta e natës”.
“Ka kërkesa për rritje e fashave orare, s’duhet të nxitohemi, sepse Franca u mbyll nga e para. Unë isha në Paris dhe aty ishin të gjitha të mbyllura, vetëm ushqimoret ishin të hapura. Është vala e tretë, është version britanik, është dhe arsyeja që na solli infektime të shumta tek ne. Vdekshmëria është e njëllojtë me atë të mëparshmin, por ka 30% agresivitet më shumë infektimi. Duam të vaksinojmë gjysmë milioni njerëz që në maj. Do e diskutojmë këtë për fshatin. Fasha lidhet me jetën e natës, të cilët mblidhen në zonat e populluara si mizë lisi. Jeta e natës është problemi, megjithatë do e shikojmë e do të bëjmë më të mirën”, tha Rama.
Pse kryeministri i vendit Edi Rama e bëri këtë deklaratë? A bën kryeministri diferencime mes qytetit dhe fshatit? Përgjigjen e ka dhënë vetë. Por një gjë është e sigurt, se këto deklarata të kryeministrit, ndoshta nuk i ofendojnë disa persona që nuk e kuptojnë, por shumicën prej tyre, po!
