Pavarësisht situatës ekonomike të vështirë që po kalon vendi ynë, autoritetet shtetërore, vijojnë të zbrazin arkën e shtetit, duke ushqyer privatin me taksat e shqiptarëve.
Një nga kompanitë e cila është “fryrë” nga buxheti i shtetit është “Farma Net Albania” e Sokol Topçiut.
Pas tenderave të shumtë të dhuruar nga Ministria e Shëndetësisë, kësaj here ka menduar Drejtoria e Përgjithshme e Shërbimeve të Transportit Rrugor, e drejtuar nga Blendi Gonxhja.
Kjo drejtori do të harxhojë 48 milion lekë për blerjen e 50 mijë maskave për një periudhë 5 mujore.
Kontrata është lidhur dy ditë më parë dhe është ndjekur një procedurë me negocim dhe pa njoftim.
Në garë morën pjesë “Euromed” dhe “Farma Net Albania”, ku u shpall fituese kjo e fundit.
Në tender theksohet se kompania kontraktore, duhet të siguronte sasinë e maskave brenda 10 ditëve nga firmosja e kontratës, duke hedhur kështu dyshime se fituesi ishte i paracaktuar.
Kjo nuk është hera e parë që “Farma Net Albania” bëhet fituese e tenderave pa garë.
“Gazetareforma” gjatë hulumtimeve, ka zbuluar se kjo kompani ka fituar një tender me vlerë 12.6 milion lekë të rinj nga OSHEE, për blerjen e maskave respiratore me valvul FPP1. (Lexo këtu)
Pas kërkimeve të bëra në treg, rezulton se një maskë e tillë në farmaci kushton 850 lekë me çmim pakice, çka do të thotë se OSHEE do të pajiset me rreth 15 mijë maska.
Mister mbetet fakti se për çfarë i duhet OSHEE-së një numër kaq i madh maskash, në një kohë kur vetë OBSH është e paqartë në lidhje me përdorimin e tyre.
Gjithashtu në muajin mars, “Farma Net Albania” ka përfitur një tender po për maska nga Posta Shqiptare”, me vlerë 100 mijë euro. (Lexo këtu)
Gjatë periudhës së epidemisë, kjo kompani ka përfituar nga institucionet shtetërore, rreth 3.5 milion euro tendera kryesisht për blerje maskash, ku të gjithë janë zhvilluar me negocim dhe pa garë.
SPAK ndërkohë ka nisur verifikimet për denoncimet e PD, për tenderat e Ministrisë së Shëndetësisë, të klasifikuar “sekret”.
